കൊളംബോ: പ്രസിഡന്റ് ഗോദബയ രാജപക്സെയ്ക്കെതിരെ തെരുവിലിറങ്ങി ബുദ്ധ സന്യാസിമാര്. പ്രസിഡന്റിന്റെ ഔദ്യോഗിക വസതിയിലേക്കുള്ള മാര്ച്ചില് സന്യാസിമാരുടെ നീണ്ടനിരതന്നെ അണിനിരന്നു. ശ്രീലങ്കന് ക്രിക്കറ്റ് ഇതിഹാസം സനത് ജയസൂര്യയും പ്രക്ഷോഭത്തില് പങ്കാളിയായി. നിരവധി പ്രമുഖരും പ്രക്ഷോഭത്തിന് പിന്തുണ അറിയിച്ച് രാജ്യതലസ്ഥാനത്ത് എത്തിയിരിക്കുകയാണ്.
സമരക്കാര് കൊളംബോയില് എത്താതിരിക്കാന് നിര്ത്തിവെച്ചിരുന്ന ട്രെയിന് സര്വീസുകള് പുനസ്ഥാപിച്ചിരിക്കുകയാണ്. അതിനാല് തന്നെ രാജ്യതലസ്ഥാനത്തേക്കുള്ള പ്രക്ഷോഭകരുടെ ഒഴുക്കും വര്ധിച്ചു. അടിയന്തിര പാര്ലമെന്റ് സമ്മേളനം വിളിച്ചുചേര്ക്കാന് പ്രധാനമന്ത്രി റെനില് വിക്രമ സിംഗെ സ്പീക്കറോട് ആവശ്യപ്പെട്ടു. നിരവധി പാര്ലമെന്റ് അംഗങ്ങളും അക്രമിക്കപ്പെട്ടതായി അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്യുന്നു.
ആയിരക്കണക്കിന് പ്രക്ഷോഭകര് പ്രസിഡന്റിന്റെ ഔദ്യോഗിക വസതിയിലേയ്ക്ക് ഇരച്ചുകയറി. പ്രസിഡന്റ് ഗോദബയ രാജപക്സെ വസതിയില് നിന്നും മാറിയിരുന്നു.
രാജപക്സെ കുടുംബം ഭരണത്തില് നിന്നും പൂര്ണമായും ഒഴിവാകണമെന്നാണ് പ്രക്ഷോഭകരുടെ ആവശ്യം. പ്രസിഡന്റിന്റെ രാജി ആവശ്യപ്പെട്ട് ശ്രീലങ്കയില് പ്രക്ഷോഭം തുടങ്ങിയിട്ട് മാസങ്ങളായി. മഹിന്ദ രാജപക്സെ പ്രധാനമന്ത്രി സ്ഥാനം രാജിവച്ചിട്ടും ഗോദബയ പ്രസിഡന്റായി തുടര്ന്നു. ഇതാണ് പെട്ടെന്ന് കലാപം പൊട്ടിപ്പുറപ്പെടാന് കാരണം.
പ്രമുഖ കായിക താരങ്ങളും ബുദ്ധ സന്യാസിമാരും പ്രസിഡന്റിന്റെ വസതിയിലേയ്ക്ക് നടന്ന മാര്ച്ചില് സംഘടിച്ചെത്തി. തലസ്ഥാനത്തിന്റെ വിവിധ ഭാഗങ്ങളില് നിന്നും സൈന്യം പിന്മാറിയിട്ടുണ്ട്. വലുതല്ലാത്ത ചെറുത്തുനില്പ്പുകള്ക്ക് സൈന്യം ശ്രമിച്ചെങ്കിലും അവയൊന്നും ഫലം കണ്ടില്ല.
