കോഴിക്കോട്: ഇന്ത്യ കണ്ട ഏറ്റവും മഹത്തായ കായിക താരങ്ങളില്‍ ഒരാളായ ഒളിമ്പ്യന്‍ പി.ടി. ഉഷയുടെ യോഗ്യത അളക്കാന്‍ ശ്രമിച്ചത് വഴി രാജ്യത്തിന്റെ കായികമേഖലയെയും രാജ്യത്തിന്റെ അഭിമാനത്തേയുമാണ് എളമരം കരീം എംപി അപമാനിച്ചതെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍. കഴിഞ്ഞ നാല് പതിറ്റാണ്ടുകളായി പി.ടി. ഉഷ ഭാരതത്തിന് നല്‍കുന്ന സംഭാവന വിലപ്പെട്ടതാണ്. പല അന്താരാഷ്‌ട്ര മത്സര വേദികളിലും ഇന്ത്യന്‍ ദേശീയപതാക വിജയക്കൊടിയായി പറിച്ച രാജ്യത്തിന്റെ അഭിമാനമാണ് അവര്‍. രാജ്യത്തിന് വേണ്ടി ഇത്രയേറെ നേട്ടങ്ങള്‍ കൈവരിച്ച പി.ടി ഉഷയുടെ രാജ്യസഭാംഗത്വത്തെ അവഹേളിക്കാന്‍ രാജ്യദ്രോഹികള്‍ക്ക് മാത്രമേ കഴിയൂ. കേവലം സങ്കുചിത രാഷ്‌ട്രീയത്തിന്റെ പേരില്‍ കായിക പ്രതിഭയെ അപമാനിക്കുന്നത് ഒരു ജനപ്രതിനിധിക്ക് ചേര്‍ന്നതല്ലെന്ന് കരീം മനസിലാക്കണമെന്നും കെ.സുരേന്ദ്രന്‍ ആവശ്യപ്പെട്ടു.
രാജ്യത്തിന്റെ ഭരണഘടനയേയും ദേശീയ ഹീറോകളെയും അപമാനിക്കുന്നത് സിപിഎം നേതാക്കള്‍ പതിവാക്കിയിരിക്കുകയാണ്. തുടര്‍ഭരണത്തിന്റെ ഹുങ്കില്‍ മാര്‍കിസ്റ്റുകാര്‍ അസഹിഷ്ണുതയുടെ വക്താക്കളായി മാറി കഴിഞ്ഞു. കഴിഞ്ഞ ദിവസം നിയമസഭയില്‍ സിപിഎം എംഎല്‍എ അംബേദ്ക്കറിനെ അപമാനിച്ചത് കേരളം കണ്ടതാണ്. ചങ്കില്‍ ചൈനയെ കൊണ്ട് നടക്കുന്നത് കൊണ്ടാണ് സിപിഎം നേതാക്കള്‍ ഇങ്ങനെ സ്വയം അപഹാസ്യരായി മാറുന്നത്. എളമരം കരീമിന്റെ യോഗ്യത എന്താണെന്ന് കോഴിക്കോട്ടുകാര്‍ക്ക് വ്യക്തമായി അറിയാമെന്നും സുരേന്ദ്രന്‍ പറഞ്ഞു.
