തിരുവനന്തപുരം: സംസ്ഥാനത്ത് ഇന്നും അതിശക്തമായ മഴയുണ്ടാകുമെന്ന് മുന്നറിയിപ്പ്. ഇതേത്തുടര്ന്ന് ആറ് ജില്ലകളില് ഓറഞ്ച് അലെര്ട്ട് പ്രഖ്യാപിച്ചു. ഇടുക്കി, തൃശൂര്, മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളിലാണ് ഓറഞ്ച് അലര്ട്ട്. ഈ ജില്ലകഖില് അതിശക്തമായ മഴ സാദ്ധ്യതയുണ്ട്. മറ്റ് ജില്ലകളിലെല്ലാം യെല്ലോ അലര്ട്ടാണ്. നാളെ ആറും മറ്റന്നാള് ഒന്പതും ജില്ലകളില് ഓറഞ്ച് അലര്ട്ടുണ്ട്.
ഇന്ന് വടക്കന് കേരളത്തിലാകും കനത്ത മഴ ലഭിക്കുക. കാലവര്ഷക്കാറ്റ് ശക്തിപ്രാപിച്ച് തെക്കോട്ട് നീങ്ങിയതും ജാര്ഖണ്ഡിന് മുകളില് ചക്രവാത ചുഴിയുളളതുമാണ് സംസ്ഥാനത്ത് മഴ കൂടാന് കാരണം. ഇടുക്കി,തൃശൂര്, മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളില് നാളെയും ഓറഞ്ച് അലര്ട്ടാണ്. ഈ ജില്ലകള്ക്കൊപ്പം ആലപ്പുഴ, കോട്ടയം, എറണാകുളം ജില്ലകളിലേക്കും മഴ വ്യാപിക്കുന്നതിനാല് മറ്റന്നാള് ഒന്പത് ജില്ലകളില് ഓറഞ്ച് അലര്ട്ടാണ്. സംസ്ഥാനത്തെ വിവിധയിടങ്ങളില് മഴക്കെടുതിയും റിപ്പോര്ട്ട് ചെയ്തിട്ടുണ്ട്.
