കണ്ണൂര് : മുഖ്യമന്ത്രിക്കെതിരെയുള്ള പ്രതിഷേധവാര്ത്ത റിപ്പോര്ട്ട് ചെയ്തതിന് പിന്നാലെ പിണറായിയുടെ ബന്ധു വധ ഭീഷണി മുഴക്കുന്നതായി മാധ്യമപ്രവര്ത്തകന്. മുഖ്യമന്ത്രിയുടെ സഹോദരന്റെ മകന് ഭീഷണിപ്പെടുത്തുകയാണ്. കണ്ണൂരില് പേടിയോടെയാണ് ജീവിക്കുന്നതെന്നും മാധ്യമപ്രവര്ത്തകനായ ശിവദാസന് കരിപ്പാല് അറിയിച്ചു.
മുഖ്യമന്ത്രിക്കെതിരെ യൂത്ത് കോണ്ഗ്രസ് നടത്തിയ പ്രതിഷേധം റിപ്പോര്ട്ട് ചെയ്തതിനെ തുടര്ന്നാണ് ശിവദാസനെതിരെ വധഭീഷണി ഉയര്ന്നത്. പിണറായിയുടെ ബന്ധു സി. സത്യന് വധഭീഷണി മുഴക്കി വാട്സ്ആപ്പില് സന്ദേശം അയയ്ക്കുകയായിരുന്നു. തന്റെ ജീവന് ഭീഷണിയുണ്ട്. കണ്ണൂരില് ജീവിക്കാന് പേടിയുണ്ട്. പോലീസില് പരാതി നല്കുന്നതില് ഇന്ന് തീരുമാനമെടുക്കുമെന്നും ശിവദാസന് മാധ്യമങ്ങളോട് പറഞ്ഞു.
അതേസമയം മാധ്യമപ്രവര്ത്തകന് ശിവദാസന് കരിപ്പാലിന് താന് സന്ദേശം അയച്ചതായി സത്യന് പ്രതികരിച്ചു. പറഞ്ഞ വാക്കുകളില് താന് ഉറച്ച് നില്ക്കുകയാണ്. മാധ്യമങ്ങളോട് കൂടുതല് വിശദീകരിക്കാനില്ലെന്നും സത്യന് അറിയിച്ചു.
