എറണാകുളം: തൃക്കാക്കര ഉപതെരഞ്ഞെടുപ്പ് ഫലം പുറത്തുവന്നതിന് പിന്നാലെ കോണ്ഗ്രസിനെതിരെ ഡിവൈഎഫ്ഐ അഖിലേന്ത്യാ അധ്യക്ഷന് എ.എ റഹീം എം.പി. കോണ്ഗ്രസ് പ്രവര്ത്തകര് വിജയാഹ്ലാദപ്രകടനത്തില് തിരുതമീന് കൈയ്യില് ഉയര്ത്തിപ്പിടിച്ച് മുദ്രാവാക്യം വിളിച്ചു. ഇത് വംശീയാധിഷേപമാണെന്നാണ് റഹീമിന്റെ ആരോപണം.
കെ.വി. തോമസിനെ നിങ്ങള്ക്ക് രാഷ്ട്രീയമായി നേരിടാം. പക്ഷേ എറണാകുളം പട്ടണത്തിലൂടെ അദ്ദേഹത്തിനെ വംശീയാധിക്ഷേപം നടത്തുന്ന രീതിയില് തിരുത മീനുമായി പ്രകടനം നടത്തുകയാണ്. വംശീയാധിക്ഷേപം നടത്താനുള്ള ലൈസന്സാണ് തൃക്കാക്കരയിലെ വിജയമെന്ന് കോണ്ഗ്രസുകാര് ആരും തെറ്റിദ്ധരിക്കരുതെന്ന് റഹീം പറഞ്ഞു. മുതിര്ന്ന കോണ്ഗ്രസ് നേതാക്കളാരും ഇതിനെതിരെ പ്രതികരിച്ചില്ലെന്നും റഹീം കുറ്റപ്പെടുത്തി. ചാനല്ചര്ച്ചയിലായിരുന്നു അദേഹത്തിന്റെ വിമര്ശനം.
ബെന്നി ബഹനാന് കിട്ടിയതിനേക്കാള് ഭൂരിപക്ഷം നേടി തൃക്കാക്കര ഇതുവരെ കണ്ടതിലെ ഏറ്റവും വലിയ ഭൂരിപക്ഷത്തോടെയാണ് കോണ്ഗ്രസിന്റെ ഏക വനിതാ എംഎല്എയായി നിയമസഭയിലേക്ക് എത്തുന്നത്. ഇരുപതില്ത്താഴെ ബൂത്തുകളില് മാത്രമാണ് ജോ ജോസഫിന് മുന്തൂക്കം കിട്ടിയത്. കോണ്ഗ്രസ് പ്രവര്ത്തകര് മണ്ഡലത്തിലെങ്ങും പടക്കം പൊട്ടിച്ചും മറ്റും ആഹഌദ പ്രകടനത്തിലാണ്.
എറണാകുളം മഹാരാജാസ് കോളേജിലായിരുന്നു വോട്ടെണ്ണല്. പോസ്റ്റല് വോട്ടുകള് മുതല് അവസാന വോട്ടിങ് മെഷീനിലെ വോട്ടെണ്ണുന്നത് വരെ ഉമാ തോമസ് എതിരാളികളെ മറികടക്കാന് അനുവദിച്ചില്ല. ഒരോ റൗണ്ടിലും വ്യക്തമായ ഭൂരിപക്ഷം നിലനിര്ത്തിയാണ് ഉമ തോമസ് മുന്നേറിയത്.
നഗരമണ്ഡലമായ തൃക്കാക്കരയില് ഇത്തവണ കണ്ടത് ഇതുവരെ കണ്ടതില് ഏറ്റവും കുറഞ്ഞ പോളിംഗായിരുന്നു. ഇത്തവണ 68.77% പോളിംഗ് മാത്രമാണ് തൃക്കാക്കരയില് രേഖപ്പെടുത്തിയത്. 2021ല് പി.ടി.തോമസ് 14329 വോട്ടുകളുടെ ഭൂരിപക്ഷത്തിനാണ് വിജയിച്ചിരുന്നത്. മണ്ഡലം രൂപീകരിച്ചതിന് ശേഷമുള്ള ആദ്യ തെരഞ്ഞെടുപ്പില് ബെന്നി ബെഹനാന് നേടിയ 22406 വോട്ടിന്റെ ലീഡായിരുന്നു ഇതുവരെയുള്ള റെക്കോര്ഡ്. അതെല്ലാം പിന്തള്ളിക്കൊണ്ടാണ് ഉമ തോമസ് നിയമസഭയിലേക്ക് ചുവടുവെച്ചിരിക്കുന്നത്.
