കമല് ഹാസന്, ഫഹദ് ഫാസില്, വിജയ് സേതുപതി എന്നിവരെ കേന്ദ്ര കഥാപാത്രങ്ങളാക്കി ലോകേഷ് കനകരാജ് ഒരുക്കുന്ന ‘വിക്രം’ സിനിമയുടെ പ്രൊമോഷന്റെ ഭാഗമായി ടീം കൊച്ചിയിലെത്തും. കമല് ഹാസനും കേരളത്തിലെത്തും. മെയ് 27നു വൈകുന്നേരം 4.30 ന് കൊച്ചി ലുലു മാളില് ആണ് പരിപാടി നടക്കുന്നത്. കമലിനെ കേരളത്തിലേക്ക് വരവേറ്റ് നടന് ഫഹദ് ഫാസിലും ചടങ്ങില് പങ്കെടുക്കും.
തനിക്കെന്നും പ്രിയപ്പെട്ട കേരളത്തിലേക്ക് ആരാധകരെ കാണാനും വിക്രം വിശേഷങ്ങള് പങ്കുവയ്ക്കാനും കമല്ഹാസന് എത്തുമ്പോള്, അദ്ദേഹത്തിനൊപ്പം ചിത്രത്തിന്റെ സംവിധായകന് ലോകേഷ് കനകരാജ്, മറ്റു താരങ്ങള്, അണിയറപ്രവര്ത്തകര് പ്രസ്തുത ചടങ്ങില് പങ്കെടുക്കും.
വിജയ് സേതുപതി, ഫഹദ് ഫാസില്, നരേന്, ചെമ്പന് വിനോദ്, കാളിദാസ് ജയറാം തുടങ്ങിയ താരങ്ങള് ഉള്ള ചിത്രത്തിന്റെ ട്രൈലര് പുറത്തിറങ്ങിയപ്പോള് തന്നെ മാസ്സ് എന്റെര്റ്റൈനെര് എന്നുള്ള വിലയിരുത്തല് പ്രേക്ഷകരുടെ ഭാഗത്തു നിന്ന് ലഭിച്ചിരുന്നു. ഷിബു തമീന്സിന്റെ നേതൃത്വത്തില് റിയാ ഷിബുവിന്റെ എച്ച് ആര് പിക്ചേഴ്സ് ആണ് കേരളത്തില് വിക്രം വിതരണത്തിനെത്തിക്കുന്നത്.
