ലഖ്നോ: അയോധ്യയിലെ മുസ്ലിം പള്ളികള്ക്ക് മുന്നില് മാംസം വിതറി. ഒപ്പം വിശുദ്ധഗ്രന്ഥത്തിന്റെ പേജുകള് കീറിയെറിഞ്ഞു. മുസ്ലിം തൊപ്പിധരിച്ച് ടൂ വീലറുകളിലെത്തിയ യുവാക്കളാണ് ഇത്രയും ചെയ്തത്. അയോധ്യയില് വര്ഗ്ഗീയ കലാപമുണ്ടാക്കാനുള്ള മോഹന് മിശ്ര എന്ന ക്രിമിനലിന്റെ നേതൃത്വത്തില് നടന്ന ശ്രമം യോഗിയുടെ ഉത്തര്പ്രദേശ് പൊലീസ് പൊളിച്ചു.
പള്ളിയധികൃതര്ക്ക് തന്നെ പന്തികേട് തോന്നി യുപി പൊലീസിനെ വിവരം അറിയിക്കുകയായിരുന്നു. സിസിടിവി ക്യാമറ പരിശോധിച്ച പൊലീസിന് കാര്യങ്ങള് വ്യക്തമായി. ഹിന്ദു യുവാക്കള് തന്നെയാണ് ടൂ വീലറുകളില് അര്ധരാത്രിയെത്തി മുസ്ലിംപള്ളികള്ക്ക് മുന്പില് മാംസക്കഷണം വലിച്ചെറിയുകയും വിശുദ്ധഗ്രന്ഥം ചീന്തിയെറിയുകയും ചെയ്തത്.
മഹേഷ് കുമാര് മിശ്ര, പ്രത്യൂഷ് ശ്രീവാസ്തവ, നിതിന് കുമാര്, ദീപക് കുമാര് ഗൗര് എന്ന ഗുഞ്ജന്, ബ്രിജേഷ് പാണ്ഡേ, ശത്രുഘന് പ്രജാപതി, വിമല് പാണ്ഡേ എന്നീ അയോധ്യ സ്വദേശികളെയാണ് പിടികൂടിയത്. ഇവരെ വിശദമായി ചോദ്യം ചെയ്തുവരികയാണ്.
സംഘത്തില്പ്പെട്ട ഏതാനും പേരെക്കൂടി പിടികൂടാനുണ്ട്. ദല്ഹിയിലെ ജഹാംഗീര് പുരിയില് ഹനുമാന് ജയന്തിയാത്രയ്ക്ക് നേരെ കല്ലെറിഞ്ഞതില് പ്രതിഷേധിച്ചാണ് ഈ നീക്കമെന്നാണ് പ്രതികള് പറയുന്നതെങ്കിലും പൊലീസ് ഇത് വിശ്വസിച്ചിട്ടില്ല. മറ്റേതെങ്കിലും നിഗൂഢശക്തികള് ഇതിന് പിന്നിലുണ്ടോ എന്ന സംഘയവും പൊലീസിനുണ്ട്.
