ഏറ്റുമാനൂര്‍: ഏറ്റുമാനൂരില്‍ മീനച്ചിലാറ്റില്‍ രണ്ടു വിദ്യാര്‍ത്ഥികള്‍ മുങ്ങിമരിച്ചു. ചെറുവാണ്ടൂര്‍ കിഴക്കേ മാന്തോട്ടത്തില്‍ ലിജോയുടെ മകന്‍ അമല്‍ (16), ചെറുവാണ്ടൂര്‍ വെട്ടിക്കല്‍ സുനിലിന്റെ മകന്‍ നവീന്‍ (15) എന്നിവരാണ് മരിച്ചത്. ഇന്ന് രാവിലെ 10 മണിയോടെ പേരൂര്‍ പള്ളിക്കുന്നില്‍ കുളിക്കാനെത്തിയവരാണ് 12 മണിയോടെ അപകടത്തില്‍പെട്ടത്.
പള്ളികുന്ന് മാവിന്‍ചുവട് കടവില്‍നിന്ന് കുളിക്കാനിറങ്ങിയ നാല് പേരില്‍ രണ്ട് പേരാണ് പുഴയിലെ കയത്തില്‍ മുങ്ങിതാഴ്ന്നത്. സൈക്കിളിലാണ് എത്തിയ ഇവര്‍ നല്ല ഒഴുക്കുള്ള വളവിലാണ് കുളിക്കാനിറങ്ങിയത്. ഇത് അപകടമേഖലയാണെന്ന് പ്രദേശവാസികള്‍ പറഞ്ഞെങ്ങിലും ഇരുവരും ഇത് അവഗണിച്ചു.
കൂട്ടുകാരുടെ ബഹളം കേട്ട് പുഴയുടെ ഇരുകരകളിലും ചൂണ്ട ഇട്ടിരുന്ന നാട്ടുകാരാണ് രക്ഷാപ്രവര്‍ത്തനം നടത്തിയത്. അമല്‍ മരിച്ച നിലയിലായിരുന്നു. നവീനെ തെള്ളകത്തെ സ്വകാര്യ ആശുപത്രിയില്‍ പ്രവേശിപ്പിച്ചുവെങ്കിലും പിന്നീട് മരിച്ചു. ഏറ്റുമാനൂര്‍ ഗവ. ബോയ്‌സ് ഹൈസ്‌കൂള്‍ വിദ്യാര്‍ത്ഥി ആണ് അമല്‍. നവീന്‍ മാന്നാനം സെന്റ് എഫ്രേംസ് സ്‌കൂള്‍ വിദ്യാര്‍ഥിയാണ്.
