ന്യൂദല്‍ഹി: രാജ്യത്തെ എല്ലാ സാമ്പത്തിക കുറ്റകൃത്യത്തിനും പിന്നില്‍ ഗാന്ധി കുടുംബമാണെന്ന് ബിജെപി നേതാവ് അമിത് മാളവ്യ.
‘മല്ല്യ പതിവായി സോണിയാ ഗാന്ധിയ്‌ക്ക് വിമാനയാത്രയ്‌ക്കുള്ള അപ്‌ഗ്രേഡ് ചെയ്ത ടിക്കറ്റുകള്‍ അയച്ചുകൊടുക്കുമായിരുന്നു. മന്‍മോഹന്‍ സിങ്ങ്, പി. ചിദംബരം എന്നിവരുടെ അടുത്ത് മല്ല്യയ്‌ക്ക് എപ്പോഴും പ്രവേശനം ഉണ്ടായിരുന്നു. ഈ മല്ല്യ ഇപ്പോള്‍ വിചാരണയില്‍ നിന്നും ഓടിരക്ഷപ്പെടുകയാണ്. നീരവ് മോദിയുടെ ബ്രൈഡല്‍ ജ്വല്ലറി കളക്ഷന്‍ ഉദ്ഘാടനം ചെയ്തത് രാഹുല്‍ ഗാന്ധിയാണ്. നീരവ് പിന്നീട് വായ്‌പ തിരിച്ചടക്കാതെ വീഴ്ച വരുത്തി. റാണ കപൂര്‍ പ്രിയങ്ക വധ്രയുടെ കയ്യില്‍ നിന്നും പെയിന്റിംഗ് വാങ്ങി’- ട്വീറ്റില്‍ അമിത് മാളവ്യ പറയുന്നു.
‘മുന്‍ യെസ് ബാങ്ക് സിഇഒ ആയിരുന്ന റാണാകപൂര്‍ ഇഡിയോട് വെളിപ്പെടുത്തിയതാണ് പ്രിയങ്ക വധ്ര സമ്മര്‍ദ്ദം ചെലുത്തി എം.എഫ്. ഹുസൈന്റെ പെയിന്റിംഗ് വാങ്ങിപ്പിച്ചു എന്നത്. കോണ്‍ഗ്രസ് നേതാവായ മുരളി ദിയോറ റാണാ കപൂറിനോട് പറഞ്ഞു- പെയിന്റിംഗ് വാങ്ങുന്നത് നിരസിച്ചാല്‍ ഗാന്ധി കുടുംബവുമായി ബന്ധമുണ്ടാക്കാന്‍ കഴിയില്ല, പത്മഭൂഷണ്‍ കിട്ടുകയുമില്ല’- മറ്റൊരു ട്വീറ്റില്‍ അമിത് മാളവ്യ പറയുന്നു.
‘പ്രിയങ്ക വധ്ര രണ്ട് കോടി രൂപ എന്ന വന്‍ തുകയ്‌ക്ക് റാണാ കപൂറിന് പെയിന്റിംഗ് വിറ്റു. അതും അവരുടെ ഉടമസ്ഥതയിലല്ലാത്ത പെയിന്റിംഗ്. തീര്‍ച്ചയായും ഇതിന് അപാമ മിടുക്ക് വേണം’- ഇനിയൊരു ട്വീറ്റില്‍ അമിത് മാളവ്യ വിമര്‍ശിക്കുന്നു.
