കൊച്ചി : പിറന്നാള് ആഘോഷമെന്ന് പറഞ്ഞ് വീട്ടിലേക്ക് തീകൊളുത്തി കൊല്ലാന് ശ്രമത്തിനിടെ ഗുരുതരമായി പൊള്ളലേറ്റ പെണ്കുട്ടിയും യുവാവും മരിച്ചു. പാലക്കാട് കൊല്ലങ്കോട് കിഴക്കേഗ്രാമം സ്വദേശി ധന്യ(16), സുബ്രഹ്മണ്യം(26) എന്നിവരാണ് മരിച്ചത്. ഞായറാഴ്ച രാവിലെയാണ് സംഭവം.
ധന്യ പ്ലസ്ടു വിദ്യാര്ത്ഥിനിയാണ്. പിറന്നാളാണെന്ന് പറഞ്ഞ് ബാലസുബ്രഹ്മണ്യം ധന്യയെ വീടിലേക്ക് വിളിച്ച് വരുത്തി തീ കൊളുത്തുകയായിരുന്നു. സംഭവസമയം യുവാവിന്റെ അമ്മയും ഇളയസഹോദരനും മാത്രമാണ് വീട്ടിലുണ്ടായിരുന്നത്. മുറിയില്നിന്ന് തീയും പുകയും ഉയര്ന്നതോടെയാണ് അടുക്കളയിലായിരുന്ന അമ്മയും സമീപവാസികളും സംഭവമറിഞ്ഞത്. തുടര്ന്ന് തീയണച്ച ശേഷം ഇരുവരെയും ആശുപത്രിയിലേക്ക് കൊണ്ടുപോവുകയായിരുന്നു. ഇരുവരെയും തൃശ്ശൂര് മെഡിക്കല് കോളേജ് ആശുപത്രിയിലും പിന്നീട് എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും ജീവന് രക്ഷിക്കാനായില്ല.
ബാലസുബ്രഹ്മണ്യവും പെണ്കുട്ടിയും ഏറെനാളായി പ്രണയത്തിലായിരുന്നുവെന്നാണ് നാട്ടുകാര് പറയുന്നത്. അടുത്തിടെ ഇവരുടെ ബന്ധത്തെ വീട്ടുകാര് എതിര്ക്കുകയും ഇതില് നിന്നും പിന്തിരിപ്പിക്കാന് ശ്രമിക്കുകയും ചെയ്തിരുന്നു. ഇതിനെ തുടര്ന്ന് ബാലസുബ്രഹ്മണ്യം പെണ്കുട്ടിയെ തീകൊളുത്തിയ ശേഷം ആത്മഹത്യ ചെയ്യാന് ശ്രമിച്ചത് ആയിരിക്കുമെന്നാണ് പ്രദേശ വാസികള് പറയുന്നത്. സംഭവത്തില് പോലീസ് അന്വേഷണം ആരംഭിച്ചു.
ധന്യയും തന്റെ മകനുമായി ഇഷ്ടത്തിലാണെന്ന് അറിയാമായിരുന്നു. പെണ്കുട്ടിക്ക് 18 വയസ്സായാല് വിവാഹം ചെയ്ത് നല്കാന് വീട്ടുകാര് തമ്മില് തീരുമാനിച്ചതാണ്. ഇന്ന് മകന്റെ പിറന്നാളാണ്. പെണ്കുട്ടി വീട്ടിലെത്തിയത് എപ്പോഴാണെന്ന് അറിയില്ല. താന് പാല് വാങ്ങി തിരിച്ച് വീട്ടിലേക്ക് എത്തുമ്പോള് മുറിയില് നിന്നും പുക ഉയരുന്നത് കണ്ടാണ് ശ്രദ്ധിച്ചതെന്നും സുബ്രഹ്മണ്യത്തിന്റെ അമ്മ പ്രതികരിച്ചു.
