ഇടുക്കി : കടയില്‍ സൂക്ഷിച്ചിരുന്ന 10 ചാക്ക് റേഷനരിയും രണ്ട് ചാക്ക് ഗോതമ്പും അകത്താക്കി കാട്ടാന. ഇടുക്കി ലോക്കാട് എസ്റ്റേറ്റിലെ ജയറാമിന്റെ കടയില്‍ സൂക്ഷിച്ചിരുന്ന ഭക്ഷ്യധാന്യങ്ങളാണ് കൊമ്പന്‍ രാത്രിയെത്തി ഭക്ഷിച്ചത്. എസ്റ്റേറ്റ് തൊഴിലാളികള്‍ക്ക് വിതരണം ചെയ്യാന്‍ കൊണ്ടുവന്ന അരിയും ഗോതമ്പുമായിരുന്നു ഇത്.
കഴിഞ്ഞ ഒരാഴ്ചയായി ദേവികുളം മേഖലയില്‍ തമ്പടിച്ച ഒറ്റയാനാണ് രാത്രിയോടെയാണ് എസ്റ്റേറ്റിലെത്തിയത്. കടയുടെ ജനല്‍ ചില്ല് തകര്‍ത്താണ് അരിയും ഗോതമ്പും പുറത്തെടുത്തത്. ബാക്കി ഭക്ഷ്യവസ്തുക്കള്‍ ആന നശിപ്പിച്ചു. സൂര്യനെല്ലിയില്‍ കാട്ടാന പള്ളിയുടെ കവാടം നശിപ്പിച്ചു. ഇത് ജനങ്ങളെ ആകെ ഭീതിയിലാഴ്‌ത്തിയിരിക്കുകയാണ്. തോട്ടംമേഖലകള്‍ കേന്ദ്രീകരിച്ച് കാട്ടാനകള്‍ കൂട്ടമായി എത്തുന്നത് തുടരുകയാണ്. പകല്‍നേരങ്ങളില്‍ പോലും യാത്ര ചെയ്യാന്‍ കഴിയാത്ത അവസ്ഥയിലാണെന്ന് തൊഴിലാളികള്‍ പറയുന്നു.
