കണ്ണൂര് : സിപിഎമ്മിനെ നയിക്കാന് വീണ്ടും സീതാറാം യെച്ചൂരി. കണ്ണൂരില് നടന്ന പാര്ട്ടി കോണ്ഗ്രസില് മൂന്നാം തവണയും യെച്ചൂരിക്ക് തന്നെ നറുക്ക് വീണു. വിശാഖപട്ടണത്ത് നടന്ന ഇരുപത്തിയൊന്നാമത് പാര്ട്ടി കോണ്ഗ്രസിലാണ് യെച്ചൂരി ജനറല് സെക്രട്ടറി പദത്തിലേക്ക് ആദ്യം എത്തുന്നത്.
എസ്. രാമചന്ദ്രന് പിള്ളയെ തലപ്പത്ത് എത്തിക്കാന് പ്രകാശ് കാരാട്ടും സിപിഎം കേരള ഘടകവും ശ്രമിച്ചെങ്കിലും യെച്ചൂരിയെ ജനറല് സെക്രട്ടറിയായി തെരഞ്ഞെടുക്കുകയായിരുന്നു. ഹൈദരാബാദ് പാര്ട്ടി കോണ്ഗ്രസില് യെച്ചൂരിയെ മാറ്റാനുള്ള നീക്കത്തെ ബംഗാള് ഘടകം മറികടന്നത് രഹസ്യ ബാലറ്റ് എന്ന നിര്ദ്ദേശത്തിലൂടെയാണ്.
കേരളത്തില് നിന്നും കേന്ദ്ര സെക്രട്ടറിയേറ്റ് മുന് അംഗം എ. വിജയരാഘവന് സിപിഎം പൊളിറ്റ്ബ്യൂറോയിലേക്ക് തെരഞ്ഞെടുത്തു. മഹാരാഷ്ട്രയില് നിന്നും അശോക് ധാവ്ലയും പിബിയിലേക്ക് തെരഞ്ഞെടുത്തിട്ടുണ്ട്. പാര്ട്ടി മുഖ്യധാരയിലേക്ക് ദളിതര്ക്ക് പ്രാതിനിധ്യം നല്കുന്നില്ലെന്ന് രൂക്ഷ വിമര്ശനങ്ങള് ഉയര്ന്നതോടെ പശ്ചിമ ബംഗാളില് നിന്ന് രാമചന്ദ്ര ഡോമും പിബിയിലെത്താന് ധാരണയായി. എസ് രാമചന്ദ്രന് പിള്ളയുടെ ഒഴിവിലേക്കാണ് കേരളത്തില് നിന്നും കേന്ദ്ര തലത്തില് പ്രവര്ത്തിക്കാന് വിജയരാഘവന് എത്തുന്നത്. നിലവില് എല്ഡിഎഫ് കണ്വീനറായ വിജയരാഘവന് കോടിയേരി ബാലകൃഷ്ണന് പാര്ട്ടിയില് നിന്നും വിട്ട് നിന്നപ്പോള് നേരത്ത സിപിഎം സംസ്ഥാന ആക്ടിങ് സെക്രട്ടറിയുടെ ചുമതല വഹിച്ചിരുന്നു. പിബിയിലേക്കെത്തുമ്പോള് അദ്ദേഹത്തിന് കേന്ദ്ര തലത്തില് പ്രവര്ത്തിക്കാനുള്ള അവസരമാണ് ലഭിക്കുന്നത്.
കേരളത്തില് നിന്നുള്ള നാല് പേരുള്പ്പടെ 17 പുതുമുഖങ്ങള് കേന്ദ്ര കമ്മിറ്റിയിലുണ്ട്. 85 അംഗ കേന്ദ്ര കമ്മിറ്റിയിലെ 84 പ്രതിനിധികളെയും പ്രഖ്യാപിച്ചു. സംസ്ഥാന മന്ത്രിമാരായ കെ.എന്.ബാലഗോപാല്, പി.രാജീവ് എന്നിവരെ കേന്ദ്ര കമ്മിറ്റിയില് ഉള്പ്പെടുത്താനും ധാരണയായി. സി.എസ്.സുജാത, പി.സതീദേവി എന്നിവരാണ് കമ്മിറ്റിയില് കേരളത്തില് നിന്നുള്ള വനിതാപ്രതിനിധികള്. പി.കരുണാകരന്, വൈക്കം വിശ്വന് എന്നിവരാണ് കേന്ദ്ര ക്യാബിനറ്റില് നിന്നും സ്ഥാനമൊഴിയുന്ന മലയാളികള്. അവരുടെ പകരക്കാരാണ് ബാലഗോപാലും രാജീവും. എന്നാല് അനാരോഗ്യത്തെ തുടര്ന്ന് എം.സി. ജോസഫൈന് തുടരില്ല. നിലവില് പിബിയില് 17 പേരും കേന്ദ്രകമ്മിറ്റിയില് 94 പേരുമാണ് ഉള്ളത്.
കൂടുതല് യുവത്വം വേണമെന്ന ആവശ്യമുയര്ന്നപ്പോള് കെ.എന്.ബാലഗോപാലിന്റെ പേരു പരിഗണിക്കപ്പെട്ടിരുന്നു. ആര് പിബിയില് വരികയാണെങ്കിലും മുഴുവന് സമയം പാര്ട്ടി സെന്ററിന്റെ ഭാഗമായി പ്രവര്ത്തിക്കണമെന്നാണ് കേന്ദ്രനേതൃത്വം ആവശ്യപ്പെട്ടത്.
ബാലഗോപാല് മന്ത്രിയായതിനാല് കേരള ഘടകത്തിന്റെ സമ്മര്ദ്ദത്തില് വിജയരാഘവനെ തെരഞ്ഞെടുക്കുകയായിരുന്നു. ടി.എന്. സീമ, പി.എ. മുഹമ്മദ് റിയാസ്, പി.കെ. ബിജു, എം. സ്വരാജ് എന്നിവരുടെ പേരുകളും കേരള ഘടകത്തിന്റെ മനസിലുണ്ടായിരുന്നു. മുതിര്ന്ന നേതാക്കളെന്ന നിലയില് വനിതാപ്രാതിനിധ്യത്തില് സി.എസ്. സുജാത, പി. സതീദേവി എന്നിവര്ക്കു മുന്ഗണന ലഭിച്ചു.
