കൊച്ചി: നടിയെ ആക്രമിക്കാന്‍ പള്‍സര്‍ സുനിക്ക് ക്വട്ടേഷന്‍ നല്‍കിയതില്‍ ദിലീപിനൊപ്പം ഭാര്യ കാവ്യ മാധവനും പങ്കുണ്ടെന്ന് അന്വേഷണസംഘത്തിന്റെ പ്രാഥമിക വിലയിരുത്തല്‍. കാവ്യയെ കേസുമായി ബന്ധിപ്പിക്കുന്ന തെളിവുകള്‍ ലഭിച്ചിട്ടില്ല. ചോദ്യം ചെയ്യുന്നതിലൂടെ തെളിവുകള്‍ ലഭിക്കുമെന്നാണ് പ്രതീക്ഷ.
സംവിധായകന്‍ ബാലചന്ദ്രകുമാറിനൊപ്പം ഇരുത്തിയാണ് കാവ്യയെ തിങ്കളാഴ്ച ചോദ്യം ചെയ്യുക. നടിയോട് ദിലീപിനും
കാവ്യക്കും വൈരാഗ്യമുണ്ടായിരുന്നുവെന്നും അന്വേഷണസംഘം സംശയിക്കുന്നു. ദിലീപ് ഇക്കാര്യം സുഹൃത്തുക്കളോട് പറഞ്ഞതായി കണ്ടെത്തിയിട്ടുണ്ട്. കേസില്‍ സിനിമാ മേഖലയില്‍ നിന്നുള്ള ചില സാക്ഷികള്‍ ഇത് അന്വേഷണസംഘത്തോട് പറഞ്ഞിരുന്നു. എന്നാല്‍, ഇവര്‍ പിന്നീട് മൊഴി മാറ്റി. കാവ്യയാണ് എല്ലാത്തിനും പിന്നിലെന്ന് ദിലീപിന്റെ സഹോദരി ഭര്‍ത്താവ് സുരാജ് പറയുന്ന ഫോണ്‍ ശബ്ദരേഖ വെള്ളിയാഴ്ച പുറത്തുവന്നിരുന്നു. എന്നാല്‍, സുരാജിന്റെ ആരോപണം മാത്രമാണിതെന്ന് അന്വേഷണസംഘം സംശയിക്കുന്നു.
ചെന്നൈയിലുള്ള കാവ്യ ഇന്ന് വൈകിട്ട് കൊച്ചിയിലെത്തും. കാവ്യ എത്തിയ ശേഷം ചോദ്യം ചെയ്യുന്ന സ്ഥലം തീരുമാനിച്ച് അറിയിക്കും. അന്വേഷണസംഘത്തിന് മുന്നില്‍ തിങ്കളാഴ്ച ഹാജരാവണമെന്ന് ആവശ്യപ്പെട്ടാണ് ക്രൈംബ്രാഞ്ച് നോട്ടീസ് നല്‍കിയത്. ആലുവ പോലീസ് ക്ലബ്ബില്‍ ഹാജരാകാനാണ് ആദ്യം നിര്‍ദേശിച്ചത്.
