കണ്ണൂര് : കെ റെയിലിന് എതിരായ സമരത്തിന് പിന്നില് സാധാരണക്കാരായ ജനങ്ങളല്ല. തെക്കും വടക്കുമില്ലാത്ത വിവര ദോഷികളെന്ന് സിപിഎം നേതാവ് ഇ.പി. ജയരാജന്. കെ റെയില് പദ്ധതിക്കായി ജനങ്ങള് ഇങ്ങോട്ടുവന്ന് സ്ഥലം നല്കാന് തയ്യാറാവുകയാണ്. കെ റെയില് വിരുദ്ധ സമരത്തില് ജനങ്ങളില്ല. ഇത് വിവരമില്ലാത്ത ചില വിവരദോഷികള്, തെക്കും വടക്കും ഇല്ലാത്ത കുറേയെണ്ണമെന്നും ഇ.പി. ജയരാജന് കണ്ണൂരില് പ്രതികരിച്ചു.
കോണ്ഗ്രസ്സ് നേതൃത്വം അറുവഷളന്മാരുടെ കയ്യിലാണിപ്പോള്. മുസ്ലിം ലീഗിന്റെ തണലില് വളരുന്ന ഒരു പാര്ട്ടിയാണ് കോണ്ഗ്രസ്സ്. മുസ്ലിം ലീഗ് ഇല്ലങ്കില് ഒരു സീറ്റില് പോലും ജയിക്കാന് കഴിയാത്ത ഈ ഗതികെട്ട പാര്ട്ടിയോട് എന്ത് പറയാനാണ്. പ്രതിപക്ഷ നേതാവ് വി.ഡി. സതീശന് വേറെ പണിയൊന്നുമില്ലെങ്കില് പോയി കുറ്റി പറിച്ച് നടക്കട്ടേ. കെ റെയില് പദ്ധതിയുമായി സംസ്ഥാന സര്ക്കാര് മുന്നോട്ടു പോകും.
കുറച്ച് റെഡി മേയ്ഡ് ആളുകളെ കൊണ്ടുവന്ന് ചില സ്ത്രീകളെയും കുട്ടികളെയും കൊണ്ടുവന്ന് പ്രശ്നമുണ്ടാക്കി പോലീസിനെ കൊണ്ട് നടപടി എടുപ്പിക്കാന് ചില അക്രമ പ്രവര്ത്തനങ്ങള് സംഘടിപ്പിക്കുകയാണ്. അതിന്റെ ഭാഗമാണ് ഇപ്പോള് നടന്നുകൊണ്ടിരിക്കുന്നതെല്ലാം.
നേരത്തെ കിഫ്ബിയെ എതിര്ത്ത കോണ്ഗ്രസ് നേതാക്കള് ഇപ്പോള് തലയില് മുണ്ടിട്ട് കിഫ്ബി ഓഫിസിനു മുന്നില് പോയി ആനുകൂല്യത്തിന് കാത്ത് നില്ക്കുകയാണ്. കെ റെയില് വന്നാല് അതില് ആദ്യം കയറുക കോണ്ഗ്രസ് നേതാക്കളായിരിക്കുമെന്നും ഇ.പി.ജയരാജന് കൂട്ടിച്ചേര്ത്തു.
