കുടയത്തൂര്: കൈപ്പയില് വന് തീപ്പിടിത്തം. രണ്ടേക്കറോളം കൃഷിഭൂമി കത്തിനശിച്ചു. റബ്ബര്, വാഴ, കുടിവെള്ള പൈപ്പ്ലൈന് എന്നിവ കത്തി നശിച്ചു. ഗവ. എല്പി സ്കൂളിന് സമീപമാണ് തീപ്പിടിത്തം ഉണ്ടായത്.
കൂത്താട്ടുകുളം സ്വദേശി രാജേഷ്, മുത്തുമുഖത്ത് ചിന്നമ്മ എന്നിവരുടെ പുരയിടമാണ് കത്തിനശിച്ചത്. സിനിമാ നടന് ദിലീപിന്റെ ഉടമസ്ഥതയിലുള്ള സ്ഥലത്തു നിന്നുമാണ് തീ പടര്ന്നത്. ഈ സ്ഥലം കന്നാര കൃഷിക്കായി പാട്ടത്തിന് നല്കിയതാണ്. സ്ഥലം ഒരുക്കുന്നതിനായി ചപ്പുചവറുകള് തീയിട്ടപ്പോള് തീ സമീപ പ്രദേശത്തേക്ക് വ്യാപിച്ചതാണെന്ന് നാട്ടുകാര് പറഞ്ഞു. പ്രദേശവാസികളും മൂലമറ്റം അഗ്നിശമന സേനാംഗങ്ങളും കൂടിയാണ് തീ അണച്ചത്.
നീലക്കുറിഞ്ഞി വസന്തം സമ്മാനിച്ച ഇലവീഴാപൂഞ്ചിറ ചക്കിക്കാവ് മലനിരകളില് തീപ്പിടിത്തം. ഒരു ഭാഗത്ത് നിന്ന് കത്തുന്ന മലനിരകളിലെ തീ അണയ്ക്കുക അത്ര എളുപ്പമല്ലെന്ന് നാട്ടുകാര് പറയുന്നു. മൂന്നാര് മലനിരകളില് മാത്രം കാണുന്ന നീലക്കുറിഞ്ഞി ചക്കിക്കാവ് മലനിരകളില് പൂവിട്ടത് വലിയ വാര്ത്താപ്രാധാന്യം നേടിയിരുന്നു. നീലക്കുറിഞ്ഞി പൂവിട്ട വാര്ത്ത പുറം ലോകത്ത് എത്തിച്ചത് ജന്മഭൂമിയായിരുന്നു. എന്നാല് നീലക്കുറിഞ്ഞി പൂവിട്ട മേഖല സംരക്ഷിക്കുവാന് അധികൃതര് വേണ്ട നടപടി സ്വീകരിച്ചില്ല.
കുടയത്തൂര് പഞ്ചായത്ത് അധികൃതര് നീലക്കുറിഞ്ഞി പൂക്കളും തൈകളും നശിപ്പിക്കരുത് എന്ന ബോര്ഡ് വെച്ചതല്ലാതെ മറ്റൊരു നടപടിയും സ്വീകരിച്ചില്ല. വേനല് കനത്തതോടെ പ്രദേശം തീപ്പിടിത്ത ഭീഷണിയിലാണെന്ന വാര്ത്തയും ജന്മഭൂമി നല്കിയിരുന്നു. മലനിരകളില് തീ പടരുന്നത് നീലക്കുറിഞ്ഞി ചെടികളുടെ നാശത്തിന് കാരണമാകുമോ എന്ന ആശങ്കയിലാണ് പ്രദേശവാസികള്.
കല്തൊട്ടി ചൂരപ്പൊയ്കയില് ബാബുവിന്റെ ഉടമസ്ഥതയിലുള്ള രണ്ടരയേക്കര് സ്ഥലത്താണ് തീ പടര്ന്ന് പിടിച്ചത്. ബുധനാഴ്ച്ച രാവിലെ 11 ഓടെയാണ് ചൂരപൊയ്കമേട്ടില് കൃഷിയിടത്തില് തീപ്പിടിച്ചത്. സമീപ വാസികള് റോഡരികിലിട്ട് പ്ലാസ്റ്റിക് ചവറുകള് കൂട്ടിയിട്ട് കത്തിച്ചപ്പോള് ഇവിടെ നിന്നാകാം
പുരയിടത്തിലേയ്ക്ക് തീ പടര്ന്നത് എന്നാണ് നിഗമനം. രണ്ടരയേക്കറോളം സ്ഥലം പൂര്ണ്ണമായും അഗ്നിക്കിരയായി.ഇതില് ഉണ്ടായിരുന്ന ഏലവും, വാഴയും, ജാതി മരങ്ങളും കത്തി നശിച്ചിട്ടുണ്ട്. കുടിവെള്ള പദ്ധതിയുടെ ഹോസുകളും അഗ്നിക്കിരയായി.
പുക ഉയരുന്നത് കണ്ട് നാട്ടുകാരാണ് സ്ഥലത്തെത്തി തീ കെടുത്തിയത്. വിവരമറിഞ്ഞ് ഫയര്ഫോഴ്സും സ്ഥലത്തെത്തിയിരുന്നു. കനത്ത വെയിലും, കാറ്റുമുള്ളപ്പോള് പ്ലാസ്റ്റിക് അവശിഷ്ടങ്ങള് കൂട്ടിയിട്ട് കത്തിക്കരുതെന്ന് ഉദ്യോഗസ്ഥര് നിര്ദേശം നല്കുന്നുണ്ട്.
