തിരുവനന്തപുരം: സംസ്ഥാനത്ത് മൂന്നാം തരംഗം ശക്തിപ്പെട്ടതിനാല് ഗൃഹ പരിചരണത്തിലിരിക്കുന്ന രോഗികളെക്കൂടി മുന്നില്ക്കണ്ട് ഇ സഞ്ജീവനി ശക്തിപ്പെടുത്തിയതായി ആരോഗ്യ മന്ത്രി വീണാ ജോര്ജ്. കൂടുതല് ഡോക്ടര്മാരെ നിയമിച്ച് ഇ സഞ്ജീവനി ശക്തിപ്പെടുത്തി.
24 മണിക്കൂറും പ്രവര്ത്തിക്കുന്ന കൊവിഡ് ഒപിയില് പകല് സമയം 15 മുതല് 20 ഡോക്ടര്മാരെയും രാത്രിയില് നാലു ഡോക്ടര്മാരേയും നിയമിച്ചുവെന്നും മന്ത്രി വ്യക്തമാക്കി. രാവിലെ എട്ട് മുതല് രാത്രി എട്ട് വരെ പ്രവര്ത്തിക്കുന്ന ജനറല് ഒപിയില് ഏത് വിധത്തിലുള്ള അസുഖങ്ങള്ക്കും ചികിത്സാ സംബന്ധമായ സംശയങ്ങള്ക്കും സേവനം തേടാം.
ഇ സഞ്ജീവനിയിലൂടെ ലഭിക്കുന്ന കുറിപ്പടി തൊട്ടടുത്ത സര്ക്കാര് ആശുപത്രിയില് കാണിച്ചാല് ലഭ്യമായ മരുന്നുകളും പരിശോധനകളും സൗജന്യമാണ്. സംശയങ്ങള്ക്ക് ദിശ 104, 1056, 0471 2552056, 2551056 എന്നീ നമ്പറുകളില് വിളിക്കാം.
