അതിരമ്പുഴ : എം.ജി സര്വകലാശാലയില് വിജിലന്സിന്റെ മിന്നല് പരിശോധന. കൈക്കൂലി വാങ്ങുന്നതിനിടെ ആര്പ്പൂക്കര സ്വദേശിയായ ഇടതുപക്ഷ യൂണിയന് പ്രവര്ത്തക പിടിയില്. പിടിയിലായത് ഒന്നേകാല് ലക്ഷം രൂപ കൈക്കൂലി വാങ്ങിയ കേസില്.
കൈക്കൂലി വാങ്ങുന്നതിനിടെയാണ് അതിരമ്പുഴ യൂണിവേഴ്സിറ്റി ക്യാമ്പസില് നിന്നും എം.ജി സര്വകലാശാല യൂണിവേഴ്സിറ്റി അസിസ്റ്റന്റിനെ വിജിലന്സ് പിടികൂടിയത്. ആര്പ്പൂക്കര സ്വദേശിനിയായ വനിതാ ജീവനക്കാരിയും യൂണിവേഴ്സിറ്റി അസിസ്റ്റന്റുമായ എല്സി സജിയെയാണ് വിജിലന്സ് റേഞ്ച് ഡിവൈ.എസ്.പി വിശ്വനാഥന്റെ നേതൃത്വത്തിലുള്ള സംഘം പിടികൂടിയത്. ഇവര് ക്യാമ്പസിലെ അറിയപ്പെടുന്ന സി.പി.എം നേതൃത്വത്തിലുള്ള യൂണിയന് പ്രവര്ത്തകയാണ്.
ശനിയാഴ്ച ഉച്ചയ്ക്ക് 12 മണിയോടെയായിരുന്നു കേസിനാസ്പദമായ സംഭവം. എം.ബി.എ വിദ്യാര്ത്ഥിയുടെ മാര്ക്ക് ലിസ്റ്റും പ്രൊഫഷണല് സര്ട്ടിഫിക്കറ്റും നല്കുന്നതിനായി ഒന്നര ലക്ഷം രൂപയാണ് എല്സി കൈക്കൂലിയായി ആവശ്യപ്പെട്ടത്. ഇതേ തുടര്ന്നു ഇവര് 1.25 ലക്ഷം രൂപ കൈക്കൂലിയായി നല്കി. ബാങ്ക് അക്കൗണ്ട് വഴിയാണ് ഈ തുക നല്കിയത്. ബാക്കി തുകയായ 30000 രൂപ കൂടി നല്കണമെന്ന് എല്സി ആവശ്യപ്പെട്ടു. ഇതില് ആദ്യ ഗഡുവായ 15000 രൂപ ശനിയാഴ്ച തന്നെ നല്കണമെന്നു എല്സി നിര്ബന്ധം പിടിക്കുകയായിരുന്നു. ഇതേ തുടര്ന്നു, എം.ബിഎ വിദ്യാര്ത്ഥിനി വിജിലന്സ് എസ്.പി വി.ജി വിനോദ്കുമാറിന് പരാതി നല്കി.
ഇതിന്റെ അടിസ്ഥാനത്തില് വിജിലന്സ് സംഘം കൃത്യമായ പദ്ധതി തയ്യാറാക്കിയ ശേഷം എം.ബി.എ വിദ്യാര്ത്ഥിയുടെ പക്കല് ഫിനോഫ്തലിന് പൗഡര് പുരട്ടിയ കറന്സി നോട്ട് നല്കി വിട്ടു. ഈ തുക യൂണിവേഴ്സിറ്റി ക്യാമ്പസില് വച്ച് എം.ബി.എ വിദ്യാര്ത്ഥിയുടെ പക്കല് നിന്നും ഏറ്റുവാങ്ങുന്നതിനിടെയാണ് വിജിലന്സ് സംഘം എല്സിയെ പിടികൂടിയത്. വിജിലന്സ് എസ്.പി വി.ജി വിനോദ്കുമാറിന്റെ നേതൃത്വത്തിലുള്ള വിജിലന്സ് സംഘമാണ് ഉദ്യോസ്ഥയെ പിടികൂടിയത്. വിജിലന്സ് റേഞ്ച് ഡിവൈ.എസ്.പി വിശ്വനാഥന്, ഇന്സ്പെക്ടര്മാരായ സാജു, ജയകുമാര്, നിസാം, എസ്.ഐ സ്റ്റാന്ലി, അനൂപ്, അരുണ് ചന്ദ്, അനില്കുമാര്, പ്രസന്നന് സുരേഷ്, വനിതാ സിവില് പൊലീസ് ഓഫിസര് രഞ്ജിനി എന്നിവര് ചേര്ന്നാണ് പ്രതിയെ പിടികൂടിയത്. ഇവരെ ഇന്ന് കോടതിയില് ഹാജരാക്കും.
