എറണാകുളം: നടിയെ ആക്രമിച്ച കേസിൽ ഒന്നാം പ്രതി പൾസർ സുനിയെ ക്രൈംബ്രാഞ്ച് വെള്ളിയാഴ്ച ചോദ്യം ചെയ്തു. എറണാകുളം സബ് ജയിലിലെത്തിയായിരുന്നു ചോദ്യം ചെയ്യല്.
പൾസർ സുനിയെ ജയിലിൽ ചോദ്യം ചെയ്യണമെന്ന ക്രൈംബ്രാഞ്ച് സംഘത്തിന്റെ ആവശ്യം വിചാരണ കോടതി നേരത്തെ അനുവദിച്ചിരുന്നു. എട്ടാം പ്രതി ദിലീപും ഒന്നാം പ്രതി പൾസർ സുനിയും തമ്മിലുള്ള ബന്ധം വ്യക്തമാക്കുന്ന നിർണായക തെളിവുകൾ ഉൾപ്പെടെ ബാലചന്ദ്രകുമാർ ക്രൈംബ്രാഞ്ചിന് കൈമാറിയിരുന്നു. ബാലചന്ദ്രകുമാറിന്റെ വെളിപ്പെടുത്തൽ ശരിയാണെന്ന് പൾസർ സുനി പറഞ്ഞതായി അമ്മ ശോഭനയും രഹസ്യമൊഴി നൽകിയിരുന്നു. ഈയൊരു സാഹചര്യത്തിലായിരുന്നു ജയിലിലെത്തി പൾസർ സുനിയെ ചോദ്യം ചെയ്തത്.
പൾസർ സുനി നൽകിയ പുതിയ മൊഴിയും കോടതിയിൽ ഹാജരാക്കാനാണ് ക്രൈംബ്രാഞ്ച് തീരുമാനം. നടിയെ ആകമിച്ച കേസിലെ തുടരന്വേഷണ റിപ്പോർട്ട് പൊലീസ് വെള്ളിയാഴ്ച വിചാരണ കോടതിയിൽ സമർപ്പിച്ചുകഴിഞ്ഞു. അന്വേഷണ ഉദ്യോഗസ്ഥനായ ബൈജു പൗലോസിന്റെ കൈയില് നടിയെ ആക്രമിച്ചതിന്റെ ദൃശ്യങ്ങൾ ഉണ്ടെന്നും ഇത് കോടതിയിൽ ഹാജരാക്കാൻ നിർദേശിക്കണമെന്ന് ആവശ്യപ്പെട്ട് ദിലീപ് സമർപ്പിച്ച ഹർജി വിചാരണ കോടതി ഫിബ്രവരി ഒന്നിന് പരിഗണിക്കും.
