കൊച്ചി : നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ശ്രമിച്ച കേസില് ചോദ്യം ചെയ്യലിനായി നടന് ദിലീപ് കളമശ്ശേരി ക്രൈംബ്രാഞ്ച് ഓഫീസില് ഹാജരായി. കഴിഞ്ഞ ദിവസത്തെ ഹൈക്കോടതി ഉത്തരവ് പ്രകാരം മൂന്ന് ദിവസത്തേയ്ക്കാണ് ചോദ്യം ചെയ്യുന്നത്.
ദിലീപിനൊപ്പം കേസിലെ അഞ്ച് പ്രതികളും ചോദ്യം ചെയ്യലിന് ക്രൈംബ്രാഞ്ച് ഓഫീസില് ഹാജരായിട്ടുണ്ട്. ദിലീപും സഹോദരന് അനുപൂം സഹോദരീ ഭര്ത്താവ് സൂരജും ഒന്നിച്ചാണ് എത്തിയത്. ചോദ്യം ചെയ്യല് മുഴുവന് വീഡിയോ ക്യാമറയില് പകര്ത്തും. ആദ്യഘട്ടത്തില് ഓരോ പ്രതികളെയും വെവ്വേറെ ചോദ്യം ചെയ്യും. ഇതിനായി ഉദ്യോഗസ്ഥരെ വിവിധ ടീമുകളാക്കി തിരിച്ചു.
രാവിലെ 9 മണി മുതല് രാത്രി 8 മണി വരെ ചോദ്യം ചെയ്യാം. എന്നാല്, ഈ മാസം 27ന് കേസ് വീണ്ടും പരിഗണിക്കും അതുവരെ പ്രതികളെ അറസ്റ്റ് ചെയ്യരുതെന്നും ഹൈക്കോടതി ഉത്തരവിട്ടിട്ടുണ്ട്. പ്രതികള് എല്ലാ തരത്തിലും അന്വേഷണവുമായി സഹകരിക്കാനും ഹൈക്കോടതി ആവശ്യപ്പെട്ടിട്ടുണ്ട്.
ചോദ്യം ചെയ്യലിലൂടെ ലഭിക്കുന്ന വിവരങ്ങളും മറ്റു തെളിവുകളും അടക്കമുള്ള റിപ്പോര്ട്ട് വ്യാഴാഴ്ച രാവിലെ മുദ്രവച്ച കവറില് നല്കണം. വ്യാഴാഴ്ച വരെ പ്രതികളെ അറസ്റ്റ് ചെയ്യരുതെന്നും കോടതി നിര്ദ്ദേശിച്ചിട്ടുണ്ട്. അന്വേഷണവുമായി ബന്ധപ്പെട്ട് എന്തെങ്കിലും തടസ്സമുണ്ടാക്കിയാല് ഗുരുതര നടപടി സ്വീകരിക്കും.
ദിലീപ്, സഹോദരന് അനൂപ്, സഹോദരി ഭര്ത്താവ് സൂരജ്, ബന്ധു അപ്പു, സുഹൃത്ത് ബൈജു ചെങ്ങമനാട് എന്നിവരാണ് കേസിലെ പ്രതികള്. ഉള്പ്പടെ അഞ്ച് പ്രതികളും ഞായറാഴ്ച രാവിലെ ഒമ്പത് മണിക്ക് ഹാജരാകണമെന്നാണ് ക്രൈംബ്രാഞ്ച് നോട്ടീസ് നല്കിയിരുന്നത്. അന്വേഷണവുമായി ബന്ധപ്പെട്ട് എന്തെങ്കിലും തടസ്സമുണ്ടാക്കിയാല് ജാമ്യം റദ്ദാക്കുമെന്നും ഹൈക്കോടതി മുന്നറിയിപ്പ് നല്കി. ബുധനാഴ്ച വരെ കേസ് തീര്പ്പാക്കുന്നില്ല എന്നും, അത് വരെ ദിലീപ് അടക്കമുള്ള ആറ് പ്രതികള് അന്വേഷണവുമായി സഹകരിക്കട്ടെ എന്നുമായിരുന്നു കഴിഞ്ഞ ദിവസം കോടതി അറിയിച്ചത്.
