ദുല്ഖര് സല്മാനെ നായകനാക്കി റോഷന് ആന്ഡ്രൂസ് സംവിധാനം ചെയ്യുന്ന സല്യൂട്ടിന്റെ റിലീസ് മാറ്റിവച്ചു. കോവിഡ് വ്യാപനം കണക്കിലെടുത്താണ്ചിത്രത്തിന്റെ റിലീസ് മാറ്റിവയ്ക്കുന്നതെന്ന് ദുല്ഖര് ഫെയ്സ്ബുക്ക് പോസ്റ്റിലൂടെ അറിയിച്ചത്.
മുംബൈ പോലീസിന് ശേഷം റോഷന് ആന്ഡ്രൂസ് ഒരുക്കുന്ന പോലീസ് ചിത്രമാണ് സല്യൂട്ട്. വേഫറെര് ഫിലിംസിന്റെ ബാനറില് ദുല്ഖര് സല്മാന് നിര്മ്മിക്കുന്ന അഞ്ചാമത്തെ ചിത്രം കൂടിയാണിത്. പ്രേക്ഷകരെപ്പോലെ ഈ ചിത്രത്തിന്റെ റിലീസിന് ഞങ്ങളും ആവേശത്തോടെ കാത്തിരിക്കുകയാണെന്ന് ദുല്ഖര് പറഞ്ഞു. ‘പക്ഷേ സാമൂഹിക പ്രതിബന്ധതയ്ക്ക് ഞങ്ങള് പ്രാധാന്യം നല്കുന്നു. കോവിഡ്, ഒമിക്രോണ് കേസുകളില് ഉണ്ടായ വര്ധന കണക്കിലെടുത്ത് ബുദ്ധിമുട്ടുള്ള തീരുമാനം ഞങ്ങള്ക്ക് എടുക്കേണ്ടിവന്നിരിക്കുകയാണ്. സല്യൂട്ടിന്റെ റിലീസ് നീട്ടുകയാണ്. നിങ്ങളെ നിരാശപ്പെടുത്തിയെങ്കില് ക്ഷമ ചോദിക്കുന്നു. പക്ഷേ ഇതുപോലെയുള്ള സമയത്ത് ആരോഗ്യത്തിനും സുരക്ഷയ്ക്കുമായിരിക്കണം നാം പ്രാമുഖ്യം കൊടുക്കേണ്ടത്. കഴിയാവുന്നതില് നേരത്തെ ഞങ്ങള് എത്തും. എല്ലാവരുടെയും പിന്തുണയ്ക്ക് നന്ദി’, എന്നുള്ള പോസ്റ്റാണ് ദുല്ഖര് ഫേസ്ബുക്കില് കുറിച്ചത്.
ജനുവരി 14നാണ് ചിത്രം റിലീസ് പ്രഖ്യാപിച്ചിരുന്നത്. ബോബി സഞ്ജയ് ആണ് ചിത്രത്തിന് തിരക്കഥ ഒരുക്കുന്നത്. ബോളിവുഡ് താരവും മോഡലുമായ ഡയാന പെന്റി നായികയാകുന്ന ചിത്രത്തില് മനോജ് കെ ജയന്, അലന്സിയര്, ബിനു പപ്പു, വിജയകുമാര്, ലക്ഷ്മി ഗോപാല സ്വാമി, സാനിയ ഇയ്യപ്പന് തുടങ്ങിയവര് മറ്റു പ്രധാന വേഷങ്ങളില് എത്തുന്നുണ്ട്. ദുല്ഖര് പോലീസ് വേശത്തില് എത്തുന്ന സിനിമയ്ക്ക് വലിയ പ്രതീക്ഷ തന്നെയാണ് പ്രേക്ഷകര് നല്കുന്നതും. പുതുക്കിയ തീയതി അറിയിച്ചില്ലെങ്കിലും വരും ദിവസങ്ങളില് കൂടുതല് അപ്ഡേറ്റുകള് വരുമെന്നാണ് പ്രതീക്ഷ.
