തിരുവനന്തപുരം : പുരാവസ്തു സാമ്പത്തിക തട്ടിപ്പ് കേസിലെ പ്രതി മോന്സന് മാവുങ്കലുമായി ബന്ധമുള്ളതായി കണ്ടെത്തിയ ഐജി ലക്ഷ്മണയുടെ സസ്പെന്ഷന് പിന്വലിക്കാന് നീക്കം. ഇതിന്റെ ഭാഗമായി ഐജി ലക്ഷ്മണയുടെ സസ്പെന്ഷന് പുനപരിശോധിക്കാന് ചീഫ് സെക്രട്ടറിതല സമിതിയെ സര്ക്കാര് നിയോഗിച്ചു.
മോന്സന് മാവുങ്കല് കേസില് ലക്ഷ്മണയ്ക്കെതിരായി വേണ്ടത്ര തെളിവുകളൊന്നും ഇല്ലെന്നതാണ് ക്രൈബ്രാഞ്ചിന്റെ നിലപാട്. ഇതിനെ തുടര്ന്ന് കേസില് ഐജിയെ ഇതുവരെ പ്രതി ചേര്ത്തിട്ടില്ല. ഈ സാഹചര്യത്തില് സസ്പെന്ഷന് നടപടി പുനപരിശോധിക്കാന് സര്ക്കാര് തീരുമാനിക്കുകയായിരുന്നു.
മോന്സനെ സഹായിച്ചതിന് നവംബര് 10നാണ് ഐജി ലക്ഷ്മണയെ സസ്പെന്ഡ് ചെയ്തത്. നേരത്തെ മോന്സണ് മാവുങ്കലുമായുള്ള ബന്ധം വ്യക്തമാക്കുന്ന ഇവരുടെ ചിത്രങ്ങള് പലതും പുറത്ത് വന്നിരുന്നു. ഇതിന്റെ അടിസ്ഥാനത്തില് ക്രൈംബ്രാഞ്ച് ഐജിയെ ചോദ്യവും ചെയ്തിരുന്നു. മോന്സനെതിരെ ആലപ്പുഴ എസ്പി നടത്തിയ അന്വേഷണത്തിലും ഐജി ലക്ഷ്മണ ഇടപെട്ടിരുന്നു. വകുപ്പുതല അന്വേഷണത്തിന്റെ അടിസ്ഥാനത്തിലാണ് സസ്പെന്ഡ് ചെയ്തത്.
