ദുല്ഖര് സല്മാന് നായകനാവുന്ന തമിഴ് ചിത്രം ‘ഹേയ് സിനാമിക’ ഫെബ്രുവരി 25ന് തിയറ്ററുകളിലെത്തും. ‘കണ്ണും കണ്ണും കൊളളയടിത്താല്’ എന്ന ചിത്രത്തിനു ശേഷം ദുല്ഖര് അഭിനയിക്കുന്ന തമിഴ് പ്രോജക്ട് ആണിത്. ഡാന്സ് കൊറിയോഗ്രാഫര് ബൃന്ദ ഗോപാല് ആദ്യമായി സംവിധാനം ചെയ്യുന്ന ചിത്രമാണ് ‘ഹേയ് സിനാമിക’.
അദിതി റാവുവും കാജള് അഗര്വാളുമാണ് നായികമാര്. ’96’ ലെ സൂപ്പര്ഹിറ്റ് ഗാനങ്ങള്ക്ക് ഈണം പകര്ന്ന ഗോവിന്ദ് വസന്ത് ആണ് ചിത്രത്തിന് സംഗീതം നല്കുന്നത്. കഥ, തിരക്കഥ, സംഭാഷണം, വരികള് എന്നിവ ചെയ്യുന്നത് മധന് കാര്ക്കിയാണ്. ജിയോ സ്റ്റുഡിയോസ്, ഗ്ലോബല് വണ് സ്റ്റുഡിയോസ്, വൈക്കം18 സ്റ്റുഡിയോസ് എന്നീ ബാനറുകളിലാണ് ‘ഹേയ് സിനാമിക’ നിര്മിക്കുന്നത്.
ചിത്രത്തിന് പാക്കപ്പ് പറഞ്ഞതിന് പിന്നാലെ മികച്ച ടീമിനൊപ്പം പ്രവര്ത്തിച്ച അനുഭവം ദുല്ഖര് പങ്കുവച്ചിരുന്നു. ലൊക്കേഷനില് നിന്നുള്ള ഏതാനും ചിത്രങ്ങളും താരം സോഷ്യല് മീഡിയയില് പങ്കുവച്ചു. ബൃന്ദ മാസ്റ്ററോട് നിറയെ സ്നേഹമെന്നും സിനിമയിലെ ഓരോരുത്തരും പ്രൊഫഷണല്സ് ആയിരുന്നുവെന്നും ദുല്ഖര് കുറിച്ചിരുന്നു.
