കൊച്ചി : സംസ്ഥാന സര്‍ക്കാരിന്റെ വികസന പദ്ധതികള്‍ ജനവിരുദ്ധമാണെന്ന് ആരോപിച്ച് യുഡിഎഫ് സമരം നടത്തുന്നതിനിടെ മുഖ്യമന്ത്രിയെ പുകഴ്‌ത്തിയ ശശി തരൂരിനെ രൂക്ഷമായി വിമര്‍ശിച്ച് കൊച്ചി നഗരസഭ മുന്‍ മേയര്‍ ടോണി ചമ്മിണി. പിണറായി വിജയനുമായി കഴിഞ്ഞ ദിവസം കൂടിക്കാഴ്ച നടത്തിയ തരൂര്‍ സോഷ്യയില്‍ മീഡിയയില്‍ അദ്ദേഹത്തെ പ്രകീര്‍ത്തിച്ച് പോസ്റ്റിട്ടിരുന്നു. ഇതിനെതിരെ ഫേസ്ബുക്കിലുടെ തന്നെ ടോണി ചമ്മിണി രൂക്ഷ മറുപടി നല്‍കുകയായിരുന്നു.
വിശ്വപൗരന്‍ ആണെന്നതില്‍ സന്തോഷം. കേരളം ഈ ദിവസങ്ങളില്‍ കടന്നുപൊയ്‌ക്കൊണ്ടിരിക്കുന്ന നിര്‍ഭാഗ്യകരവും ദാരുണവും അതിവൈകാരികവുമായ സംഭവവികാസങ്ങളും അതിന്മേല്‍ നമ്മുടെ മുഖ്യമന്ത്രിയുടെ പ്രൊഫഷണലായ ഇടപെടലുകളും അങ്ങ് കോംപ്ലിമെന്റ് ചെയ്യുമായിരിക്കുമല്ലേ.
ഒരു എംപിയും നാല് എംഎല്‍എമാരും ഒരു നാടും നീതിക്കായി മൂന്ന് ദിവസമായി പോലീസ് സ്റ്റേഷന്‍ വരാന്തയില്‍ ഊണും ഉറക്കവുമില്ലാതെ പോരാടുകയാണ്. അവരുടെ പോരാട്ടാവീര്യം കെടുത്തരുത് അപേക്ഷയാണ്. എന്നായിരുന്നു ടോണി ചമ്മിണിയുടെ പോസ്റ്റ്.
രണ്ട് ദിവസം മുമ്പാണ് തരൂര്‍ മുഖ്യമന്ത്രിയുമായി കൂടിക്കാഴ്ച നടത്തിയത്. അദ്ദേഹത്തിന്റെ വികസന സമീപനം പ്രൊഫഷണലാണ്. മുഖ്യമന്ത്രിയോട് സംസാരിക്കുന്നതും കാര്യം മനസിലാക്കുന്നതും എല്ലായ്‌പ്പോഴും സന്തോഷം നല്‍കുന്നതാണെന്നായിരുന്നു ശശി തരൂരിന്റെ പോസ്റ്റ്.
