ആയൂര്: ഇളമാട് സിപിഎമ്മിലെ ചേരിപ്പോരിനെതിരെ കൂടുതല് നടപടിയുമായി നേതൃത്വം. ജില്ലാകമ്മിറ്റി അംഗത്തിന്റെ വിഭാഗീയ പ്രവര്ത്തനങ്ങളില് പൊറുതിമുട്ടിയ സിപിഎം ജില്ലാ നേതൃത്വം പാര്ട്ടി സഖാക്കളുടെ പരാതിയിന്മേല് നടപടിയെടുക്കാന് നിര്ബന്ധിതരായിരിക്കുകയാണ്.
പ്രവര്ത്തകരുടെ ഗ്രൂപ്പ് പോരിനെക്കുറിച്ച് പഠിക്കാന് ഒരു വര്ഷം മുമ്പ് ജില്ലാ സെക്രട്ടേറിയറ്റ് അംഗങ്ങളായ ജോര്ജ് മാത്യു, എക്സ് ഏണസ്റ്റ് എന്നിവരെ ഉള്പ്പെടുത്തി അന്വേഷണ കമ്മിഷനെ നിയമിച്ചിരുന്നു. അന്വേഷണ കമ്മിഷന്റെ റിപ്പോര്ട്ടിന്മേല് ജില്ലാ കമ്മിറ്റി അംഗത്തിന് താക്കീത് നല്കുകയും മദര് തെരേസ പാലിയേറ്റീവിന്റെ സെക്രട്ടറി സ്ഥാനത്തു നിന്നും ലോക്കല് കമ്മിറ്റി അംഗമായ ഷീല സജീവിനെ മാറ്റുകയും കൂടാതെ ഏരിയ കമ്മിറ്റി അംഗമായ തങ്കപ്പനും താക്കീതും നല്കി.
ഇളമാട് ബാങ്കില് തിരിമറി നടത്തിയതിന്റെ പേരില് ലോക്കല് കമ്മിറ്റിയില് നിന്നും പുറത്താക്കപ്പെട്ട് അന്വേഷണം നേരിട്ട വിമലയെ സീനിയര് തസ്തികയില് നിന്നും മാറ്റി ജൂനിയര് ക്ലര്ക്കാക്കി തരം താഴ്ത്തുകയും ചെയ്തിട്ടുണ്ട്. പാര്ട്ടി നടപടി നേരിട്ട വിമലയെ കഴിഞ്ഞ ബ്രാഞ്ച് സമ്മേളനത്തില് സെക്രട്ടറിയാക്കിയ തീരുമാനം ജില്ലാ കമ്മിറ്റി മരവിപ്പിച്ചിരിക്കുകയാണ്. ഏരിയ കമ്മിറ്റി അംഗമായ ഷാജിയോട് ഗൗരവമായ ചില വിഷയങ്ങളില് ഏരിയ കമ്മിറ്റി വിശദീകരണവും ചോദിച്ചിട്ടുണ്ട്. കഴിഞ്ഞ കുറെ നാളുകളായി ഇളമാട്ട് സിപണ്ടിഎമ്മില് കലാപം നിറഞ്ഞ അന്തരീക്ഷമായിരുന്നു.
പാര്ട്ടി പ്രവര്ത്തകന്റെ വീട്ടില് കിടന്ന കാര് തല്ലിപ്പൊളിച്ചിരുന്നു. ഇതെല്ലാം ചേരിതിരിഞ്ഞ പ്രവര്ത്തനങ്ങളുടെ ഭാഗമാണെന്ന് മനസിലാക്കികൊണ്ടാണ് നേതൃത്വം ഇത്തരം നടപടികളിലേക്ക് പോയതെന്നാണ് അറിയുന്നത്. പാര്ട്ടി പ്രവര്ത്തകന്റെ കാര് തകര്ത്തത് വിഭാഗീയ പ്രവര്ത്തനങ്ങളുടെ ഭാഗമായിട്ടാണെന്നും ഇയാളെ പാര്ട്ടി മെമ്പര്ഷിപ്പില് നിന്നും ഒഴിവാക്കിയത് വിഭാഗീയത മൂലമാണെന്നും ആരോപണം ഉയര്ന്നിരുന്നു. ജില്ലാ കമ്മിറ്റി അംഗത്തിനെതിരെ വന്നിട്ടുള്ള കടുത്ത ആക്ഷേപങ്ങള് പാര്ട്ടിക്ക് നാണക്കേട് ഉണ്ടാക്കുന്നതാണെന്നും കമ്മീഷന് വിലയിരുത്തി. എന്നാല് ജില്ലാ കമ്മിറ്റി അംഗത്തിനെതിരെ കടുത്ത നടപടികളിലേക്ക് പോകുന്നത് പാര്ട്ടിക്ക് മോശം ഇമേജ് ഉണ്ടാക്കുമെന്നും റിപ്പോര്ട്ടില് പറയുന്നു.
ലോക്കല് കമ്മിറ്റി അംഗങ്ങള് ഉള്പ്പടെ നടത്തിയ ഫേസ്ബുക്ക് പരാമര്ശങ്ങള് പ്രദേശത്തെ പാര്ട്ടിയെ പ്രതിക്കൂട്ടില് നിര്ത്തുകയും അതുമൂലം പാര്ട്ടിക്ക് നാണക്കേട് ഉണ്ടായെന്നും റിപ്പോര്ട്ടില് സൂചിപ്പിക്കുന്നു. പാര്ട്ടിയെ കെട്ടുറപ്പോടെ ഒറ്റക്കെട്ടായി കൊണ്ട് പോകാന് കഴിയണമെന്ന് ജില്ലാ സെക്രട്ടറി അവതരിപ്പിച്ച പ്രമേയത്തില് പറയുന്നു. ജില്ലാ സെക്രട്ടറിയേറ്റ് അംഗീകരിച്ച കമ്മിഷന് റിപ്പോര്ട്ട് പ്രമേയമായിട്ടാണ് ഏരിയ കമ്മിറ്റിയില് അവതരിപ്പിച്ചത്. താഴെ തട്ടിലേക്ക് റിപ്പോര്ട്ട് ചെയ്യാനും തീരുമാനിച്ചിട്ടുണ്ട്.
