തിരുവനന്തപുരം : സ്വകാര്യ പങ്കാളിത്തത്തില്‍ കെഎസ്ആര്‍ടിയില്‍ ആധുനികവത്കരണം നടപ്പാക്കുമെന്ന് ഗതാഗതമന്ത്രി ആന്റണി രാജു. സ്വന്തം നിലയില്‍ ആധുനിക വത്കരണം നടത്താനുള്ള സാമ്പത്തിക സ്ഥിതിയിലല്ല കെഎസ്ആര്‍ടിസി. അതിനാലാണ് സ്വകാര്യ വത്കരണം നടപ്പാക്കുന്നതെന്നും മന്ത്രി അറിയിച്ചു. നിയമസഭയില്‍ സംസാരിക്കുകയായിരുന്നു അദ്ദേഹം.
ബസ് ഷെല്‍ട്ടര്‍ നിര്‍മാണത്തില്‍ ഉള്‍പ്പടെ സ്വകാര്യ പങ്കാളിത്തത്തില്‍ നിര്‍മാണം പൂര്‍ത്തിയാക്കാനും നടപടി സ്വീകരിച്ചു വരികയാണ്. ശബരി മലയിലേക്ക് എല്ലാ ഡിപ്പോയില്‍ നിന്നു പ്രത്യേക സര്‍വീസുകള്‍ അനുവദിക്കുന്നുണ്ട്. 200 ബസുകള്‍ അതിനായി അനുവദിച്ചുകഴിഞ്ഞു.
അതേസമയം ബസുകള്‍ പാട്ടത്തിനെടുക്കുന്ന കരാര്‍ ഇത്തവണ പുതുക്കുന്നില്ല. ഇലക്ട്രിക് ബസുകള്‍ വാടകയ്‌ക്ക് എടുത്ത് ഓടിക്കുന്നത് കെഎസ്ആര്‍ടിസിക്ക് സാമ്പത്തിക നഷ്ടമുണ്ടാക്കുന്നതാണ്. അതിനാല്‍ സിഎന്‍ജി ബസുകള്‍ക്കാണ് പ്രാധാന്യം നല്‍കുന്നതെന്നും മന്ത്രി ആന്റണി രൂജു കൂട്ടിച്ചേര്‍ത്തു.
