കൊല്ലം : ട്രെയിനിൽ ദൃശ്യമാദ്ധ്യമപ്രവര്ത്തകയ്ക്കും റെയില്വേ ഉദ്യോഗസ്ഥനായ ഭര്ത്താവിനും നേരെ ആക്രമണം. മാധ്യമപ്രവര്ത്തകയെ അപമാനിച്ച രണ്ട് യുവാക്കളെ റെയില്വേ പോലീസ് അറസ്റ്റ് ചെയ്തു. കോഴിക്കോട് പുതിയറ സ്വദേശി കെ. അജല്( 23), കോഴിക്കോട് ചേവായൂര് സ്വദേശി അതുല് (23 ) എന്നിവരാണ് പിടിയിലായത്.
ചൊവ്വാഴ്ച വൈകിട്ട് മലബാര് എക്സ്പ്രസിലായിരുന്നു സംഭവം നടന്നത്. ട്രെയിന് ചിറയിന്കീഴ് എത്തിയപ്പോഴാണ് യുവാക്കള് മാദ്ധ്യമപ്രവര്ത്തകയോട് അപമര്യാദയായി പെരുമാറിയത്. ഇത് ചോദ്യം ചെയ്തതോടെ യുവതിയെ കൈയേറ്റം ചെയ്യാനും ശ്രമിച്ചു. തുടര്ന്ന് ചിറയിന്കീഴ് സ്റ്റേഷനിലുണ്ടായിരുന്ന റെയില്വേ ഉദ്യോഗസ്ഥനായ ഭര്ത്താവിനെ യുവതി ഫോണില് വിളിച്ച് അറിയിക്കുകയായിരുന്നു. ഇദ്ദേഹമെത്തി ചോദ്യം ചെയ്തതോടെ പ്രതികള് യുവതിയുടെ ഭര്ത്താവിനെയും ആക്രമിച്ചു.
റെയില്വേ പോലീസില് അറിയിച്ചതോടെ പോലീസെത്തി ബലപ്രയോഗത്തിലൂടെയാണ് പ്രതികളെ പിടികൂടിയത്. പ്രതികള് പോലീസ് സംഘത്തെയും ആക്രമിച്ചു. ഇരുവരെയും കൊല്ലം സ്റ്റേഷനിലെത്തിച്ചാണ് അറസ്റ്റ് രേഖപ്പെടുത്തിയത്. തിരുവനന്തപുരത്ത് സ്വകാര്യ സ്ഥാപനത്തിലെ വിദ്യാര്ത്ഥികളായ പ്രതികള് ഇരുവരും കോഴിക്കോടേക്കുള്ള യാത്രയിലായിരുന്നു.
