തിരുവനന്തപുരം: വൈറ്റിലയില് ഇന്നു പുലര്ച്ചെയുണ്ടായ വാഹനാപകടത്തില് മകള് മരിച്ചതറിഞ്ഞ് മാതാവ് വിഷം കഴിച്ചു. വൈറ്റിലയില് വാഹനാപകടത്തില് മരിച്ച ആറ്റിങ്ങല് ആലംകോട് പാലാംകോണം സ്വദേശിനിയും മുന് മിസ് കേരളയുമായ അന്സി കബീറിന്റെ മാതാവ് അന്സി കോട്ടേജില് റസീനയാണ് ആത്മഹത്യയ്ക്ക് ശ്രമിച്ചത്. ഇവരെ പൊലീസ് കിംസ് ആശുപത്രിയില് പ്രവേശിപ്പിച്ചു. ഇവര് അപകടനില തരണം ചെയ്തിട്ടില്ല. പിതാവ് കബീര് വിദേശത്താണ്.
അന്സിയുടെ സുഹൃത്താണ് മരണവിവരം അടുത്തുള്ള വീട്ടില് വിളിച്ചറിയിച്ചത്. ഇതിനിടെ മറ്റാരില്നിന്നോ വിവരം അറിഞ്ഞ റസീന വിഷം കഴിക്കുകയായിരുന്നു. വാതില് തുറക്കാത്തതിനെത്തുടര്ന്ന് അയല്വാസികള് പൊലീസില് വിവരം അറിയിച്ചു. പിന്നീട് റസീന വാതില് തുറക്കുകയും ഛര്ദിക്കുകയും ചെയ്തു. സ്ഥലത്തെത്തിയ പൊലീസ് ഇവരെ ആശുപത്രിയിലേക്കു മാറ്റുകയായിരുന്നു.
കൊച്ചിയില് നിന്ന് തൃശൂരിലേക്കുള്ള യാത്രക്കിടെ എറണാകുളം ബൈപ്പാസ് റോഡില് ഹോളിഡേ ഇന്ഹോട്ടലിനു മുന്നില് വച്ചായിരുന്നു അപകടം. 2019 ലെ മിസ് കേരള അന്സി കബീറും (25) റണ്ണറപ്പ് അഞ്ജന ഷാജനും(26) പുറമെ സുഹൃത്തുക്കളും തൃശൂര് സ്വദേശികളുമായ മുഹമ്മദ് ആഷിക്, അബ്ദുള് റഹ്മാന് എന്നിവരാണ് കാറില് ഉണ്ടായിരുന്നത്.
അര്ധരാത്രിയോടെ പരിപാടി കഴിഞ്ഞ് മടങ്ങിയ സംഘത്തിന്റെ കാര് അമിത വേഗതയിലായിരുന്നുവെന്നും ദൃക്സാക്ഷികള് പറഞ്ഞതായി പൊലീസ് വ്യക്തമാക്കി. മുന്നിലെ ബൈക്കിനെ മറികടക്കുന്നതിനിടെ കാര് ബൈക്കില് തട്ടി നിയന്ത്രണം വിട്ട് മരത്തിലിടിച്ച് മറിയുകയായിരുന്നു. അപകടത്തില് കാര് പൂര്ണ്ണമായും തകര്ന്നു.ആന്സിയും അഞ്ജനയും സംഭവസ്ഥലത്ത് തന്നെ മരിച്ചു.ഇതില് അബ്ദുള് റഹ്മാനാണ് കാര് ഓടിച്ചിരുന്നതെന്നാണ് വിവരം.മുഹമ്മദ് ആഷിഖിന്റെ നില ഗുരുതരമായി തുടരുകയാണ്.കാറിലുണ്ടായിരുന്ന എന്നിവരെ എറണാകുളം മെഡിക്കല് സെന്റര് ആശുപത്രിയില് പ്രവേശിപ്പിച്ചു.
