തിരുവനന്തപുരം : സംസ്ഥാനത്ത് ഭീതിവിതച്ച് ശക്തമായ മഴ. തെക്കന് ജില്ലകളിലും മധ്യകേരളത്തിലും ശക്തമായ മഴയാണ്. ഇതിനെ തുടര്ന്ന് അഞ്ച് ജില്ലകളില് റെഡ് അലേര്ട്ട് പ്രഖ്യാപിച്ചിരിക്കുകയാണ്. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂര് ജില്ലകളിലാണ് റെഡ് അലര്ട്ട് പ്രഖ്യാപിച്ചിരിക്കുന്നത്.
തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി ജില്ലകളില് പല സ്ഥലങ്ങളിലും തോടുകള് കരകവിഞ്ഞു. പല റോഡുകളിലും വെള്ളം കയറി. പൂഞ്ഞാര് തെക്കേക്കരയില് റെക്കോഡ് മഴയാണ് ഒറ്റമണിക്കൂറിനുള്ളില് പെയ്തത്. ഇവിടെ പല റോഡുകളും വെള്ളത്തിലായി. പെരിങ്ങുളം- അടിവാരം മേഖലയില് വെള്ളം കയറി.
കാഞ്ഞിരപ്പള്ളി 26-ാം മൈലില് വെള്ളം കയറിയതിനാല് എരുമേലി- മുണ്ടക്കയം ഭാഗത്തേക്ക് യാത്ര നിരോധിച്ചു. ഇടുക്കിയില് ദേവികുളം ഗ്യാപ് റോഡ് വഴിയുള്ള ഗതാഗതം നിരോധിച്ചു. തിരുവനന്തപുരം നഗരത്തില് വെള്ളക്കെട്ടുണ്ടായി. കോട്ടയം ജില്ലയുടെ കിഴക്കന് മേഖലയില് മഴ ശക്തമായി തുടരുകയാണ്. പൂഞ്ഞാര്, മുണ്ടക്കയം, ഇളങ്കാട് തുടങ്ങിയ പ്രദേശങ്ങളിലാണ് ശക്തമായി മഴ പെയ്യുന്നത്. പൂഞ്ഞാര് തെക്കേക്കരയില് മാത്രം കഴിഞ്ഞ ഒരു മണിക്കൂറിനിടെ 75 മി.മീറ്ററിന് മുകളില് മഴ പെയുതവെന്നാണ് പറയുന്നത്. കാഞ്ഞിരപ്പള്ളി-ഈരാറ്റുപേട്ട റോഡില് വെളളം കയറി. കൈത്തോടുകള് കരകവിഞ്ഞൊഴുകുകയാണ്. മുണ്ടക്കയം ക്രോസ് വേയില് വെള്ളം കയറി ഗതാഗതം തടസ്സപ്പെട്ടു. മേഖലയില് നിരവധി വീടുകള് വെള്ളത്തിനടിയിലായിട്ടുണ്ട്.
പത്തനംതിട്ടയില് കഴിഞ്ഞ മൂന്ന് മണിക്കൂറില് കനത്ത മഴയാണ് പെയ്തത്. 70 മി.മീറ്റര് മഴ ജില്ലയില് ലഭിച്ചു. നിലവില് മഴക്ക് കുറവുണ്ട്. പമ്പയിലും അച്ചന്കോവിലിലും മണിമലയിലിലും ജലനിരപ്പ് ഉയര്ന്നിട്ടുണ്ട്. അച്ചന്കോവില് ആറ്റിലാണ് ഏറ്റവും കൂടുതല് ജലനിരപ്പുള്ളത്. മഴ ശക്തമായി തുടരുന്ന സാഹചര്യത്തില് പമ്പ സ്നാനം അനുവദിക്കില്ലെന്ന് അധികൃതര് അറിയിച്ചിട്ടുണ്ട്.
കൊല്ലത്തിന്റെ മലയോര മേഖലകളില് വെള്ളിയാഴ്ച രാത്രി മുതല് മഴ തുടരുന്നുണ്ട്. നഗരത്തിലും രാവിലെ ശക്തമായ മഴയുണ്ടായിരുന്നു. കൊല്ലം-തിരുമംഗലം ദേശീയപാതയില് മരം കടപുഴകിയതിനെ തുടര്ന്ന് ഗതാഗതം തടസ്സപ്പെട്ടു. നിലവില് ഗതാഗതം പുനഃസ്ഥാപിച്ചിട്ടുണ്ട്. ഇന്നും നാളെയും മഴ ശക്തമായി തന്നെ തുടരുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.
അറബിക്കടലിലെ ന്യൂനമര്ദ്ദത്തിന്റെ ഫലമായി കേരളത്തില് ശക്തമായ മഴ വ്യാപകമാകുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കിയിട്ടുണ്ട്. തെക്കന്-മദ്ധ്യ ജില്ലകളില് ഇതിനോടകം ശക്തമായ മഴ വൈകുന്നേരത്തോടെ വടക്കന് ജില്ലകളിലും കനക്കുമെന്നാണ് മുന്നറിയിപ്പ്. തിരുവനന്തപുരം മുതല് കോഴിക്കോട് വരെയുള്ള ജില്ലകളില് ഇന്ന് ഓറഞ്ച് അലേര്ട്ട് പ്രഖ്യാപിച്ചിരിക്കുകയാണ്. അതിനാല് അടുത്ത 24 മണിക്കൂര് അതീവ ജാഗ്രത പുലര്ത്തേണ്ടതാണ്.
നദികളില് ജലനിരപ്പുയരാനും ചില അണക്കെട്ടുകളില് നിന്ന് വെള്ളം പുറത്തേക്കൊഴുക്കാനും സാധ്യതയുണ്ട്. നദിക്കരകളിലും അണക്കെട്ടുകളുടെ താഴെയും താമസിക്കുന്നവര് ജാഗ്രത പാലിക്കുകയും അധികൃതരുടെ നിര്ദേശങ്ങള് അനുസരിക്കുകയും ചെയ്യണം. യാതൊരു കാരണവശാലും ജലാശയങ്ങളില് ഇറങ്ങാന് പാടില്ല. മലയോര മേഖലകളിലേക്കുള്ള യാത്രകള് പരമാവധി ഒഴിവാക്കണം. മണ്ണിടിച്ചില്- ഉരുള്പൊട്ടല് സാധ്യതയുള്ള പ്രദേശങ്ങളില് അധിവസിക്കുന്നവരും അതീവ ജാഗ്രത പാലിക്കേണ്ടതാണെന്നും മുഖ്യമന്ത്രിയുടെ ഓഫീസ് അറിയിച്ചു.
കനത്ത മഴയുടെ പശ്ചാത്തലത്തില് ഇടുക്കിയിലെ രാത്രികാല യാത്ര നിരോധനം 21 വരെ നീട്ടി. വിനോദസഞ്ചാരമേഖലകളിലെ കയാക്കിങ്, ബോട്ടിങ് എന്നിവയ്ക്ക് താത്കാലികമായി നിരോധനം ഏര്പ്പെടുത്തിയിരിക്കുകയാണ്. ഈരാറ്റുപേട്ട വാഗമണ് റോഡില് പലയിടത്തും മണ്ണിടിച്ചിലിനെ തുടര്ന്ന് ഗതാഗതം തടസ്സപ്പെട്ടു.
