തിരുവനന്തപുരം: ഇന്ത്യയില്‍ 35 സംസ്ഥാനങ്ങളുണ്ടെന്ന് തെറ്റായി പറഞ്ഞത് തനിക്ക് പറ്റിയ നാക്ക് പിഴയെന്ന് വിദ്യാഭ്യാസമന്ത്രി വി. ശിവന്‍കുട്ടി.
ഇതിന്റെ പേരില്‍ മന്ത്രിയ്‌ക്കെതിരെ സമൂഹമാധ്യമങ്ങളില്‍ വന്‍തോതില്‍ വിമര്‍ശനമുയര്‍ന്നിരുന്നു. ‘ എല്ലാ മനുഷ്യനും മനുഷ്യസഹജമായ എന്തെങ്കിലും ഒരു ബുദ്ധിമുട്ട് സംഭവിക്കും. ഒരു നാക്കിന്റെ പിഴവൊക്കെ ലോകത്തുള്ള എല്ലാ മനുഷ്യനും സംഭവിക്കും. അക്കൂട്ടത്തിലുള്ള പിഴവാണ് സംഭവിച്ചത്. അതിനെ ആക്ഷേപിച്ച്‌കൊണ്ട് പല രൂപത്തില്‍ ചിത്രീകരിക്കുകയും ചെയ്യുന്നുണ്ട്. പ്രത്യേകിച്ച് ബിജെപിക്കാരും കോണ്‍ഗ്രസിലെ ഒരു വിഭാഗവുമാണ് ഇതിന്റെ പിന്നില്‍. അതുകൊണ്ട് അവര്‍ക്ക് ആശ്വാസവും ആത്മസംതൃപ്തിയും കിട്ടുമെങ്കില്‍ അങ്ങിനെ ചെയ്യട്ടെ,’ കുറ്റസമ്മതത്തോടെ ശിവന്‍കുട്ടി പറഞ്ഞു.
മന്ത്രിയുടെ ഈ പ്രസ്താവന പുറത്തുവന്നതോടെ വീണ്ടും ട്രോളര്‍മാര്‍ സമൂഹമാധ്യമങ്ങളില്‍ ഉഷാറായി. കേവലം നാക്കുപിഴയോ അതോ അറിവില്ലായ്മയോ എന്ന പുതിയ സംശയമുയര്‍ത്തിയാണ് പലരും മന്ത്രിയെ ട്രോളുന്നത്.
