മഞ്ചേരി : കാടാമ്പുഴയില് പൂര്ണ ഗര്ഭിണിയായ അമ്മയേയും മകനേയും കൊലപ്പെടുത്തിയ കേസില് പ്രതി മുഹമ്മദ് ഷെരീഫിന് ഇരട്ട ജീവപര്യന്തം. രണ്ട് ലക്ഷത്തി എഴുപത്തിഅയ്യായിരം രൂപ പിഴ ഒടുക്കാനും മഞ്ചേരി ചീഫ് ജുഡീഷ്യല് മജിസ്ട്രേറ്റ് കോടതി ഉത്തരവിറക്കി.
കാടാമ്പുഴ സ്വദേശി ഉമ്മുസല്മ മകന് ദില്ഷാദ് എന്നിവരെ കൊലപ്പെടുത്തിയ കേസില് പ്രതി കുറ്റക്കാരനാണെന്ന് കോടതി കഴിഞ്ഞ ദിവസം കണ്ടെത്തിയിരുന്നു. കൊലപാതകം, വീടുകയറി ആക്രമണം, ഗര്ഭസ്ഥ ശിശുവിനെ കൊലപ്പെടുത്തല് എന്നീ വകുപ്പുകളിലാണ് മുഹമ്മദ് ഷെരീഫ് കുറ്റക്കാരനെന്ന് കോടതി കണ്ടെത്തിയത്. ശിക്ഷ വിധിക്കാനായി ഇന്നത്തേയ്ക്ക് മാറ്റി വെയ്ക്കുകയായിരുന്നു.
2017 മെയ് 22 നായിരുന്നു നാടിനെ നടുക്കിയ കൊലപാതകം. ഭര്ത്താവുമായി അകന്ന് കഴിഞ്ഞിരുന്ന ഉമ്മുസല്മ അയല്വാസിയായ മുഹമ്മദ് ഷെരീഫുമായി അടുപ്പത്തിലായിരുന്നു. ഇയാളില് നിന്നും ഗര്ഭിണിയായതോടെ പ്രസവ ചികിത്സ ഏറ്റെടുക്കണമെന്നും കുട്ടിക്ക് ചിലവിന് തരണമെന്നും ഉമ്മുസല്മ ആവശ്യപെട്ടതോടെയാണ് പ്രശ്നങ്ങളുണ്ടായത്.
തുടര്ന്ന് കൃത്യം നടന്ന ദിവസം പ്രതി മുഹമ്മദ് ഷെരീഫ് വീട്ടിലെത്തി ഉമ്മുസല്മയെയും അവരുടെ ഏഴുവയസുകാരന് മകനേയും കഴുത്ത് ഞെരിച്ച് കൊലപ്പെടുത്തുകയായിരുന്നു. മരണ വെപ്രാളത്തിനിടയില് ഉമ്മുസല്മ പ്രസവിക്കുകയും കുഞ്ഞ് മരിക്കുകയും ചെയ്തു. വീട്ടിനുള്ളില് കഴുത്ത് ഞെരിച്ചു കൊലപ്പെടുത്തിയ നിലയില് ഉമ്മുസല്മയുടേയും മകന് ദില്ഷാദിന്റേയും മൃതദേഹം മൂന്ന് ദിവസത്തിനുശേഷം നാട്ടുകാരാണ് കണ്ടെത്തിയത്.
