തിരുവനന്തപുരം : ഒക്ടോബര് അഞ്ചോടെ സംസ്ഥാനത്തെ സ്കൂളുകള് തുറക്കുന്നത് സംബന്ധിച്ച മാര്ഗ്ഗ നിര്ദ്ദേശങ്ങള് പുറത്തിറക്കുമെന്ന് വിദ്യാഭ്യാസ വകുപ്പ് മന്ത്രി വി. ശിവന്കുട്ടി. ഇതുമായി ബന്ധപ്പെട്ട് ഗതാഗത, വിദ്യാഭ്യാസ വകുപ്പ് ഉന്നത ഉദ്യോഗസ്ഥരുടെ യോഗം ഇന്ന് വിളിച്ചു ചേര്ത്തിട്ടുണ്ട്. ഇതില് സ്കൂള് തുറക്കുന്നതിനുള്ള മാനദണ്ഡം നിശ്ചയിക്കും.
സകൂള് തുറക്കുന്നത് സംബന്ധിച്ച് വിവിധ വകുപ്പുകളുമായി ചര്ച്ച നടത്തി ധാരണയില് എത്തിയിട്ടുണ്ട്. സകൂള് തുറക്കുന്നതിന് മുന്നോടിയായി അധ്യാപക- വിദ്യാര്ത്ഥി സംഘടനകളുടെ യോഗവും കളക്ടര്മാരുടെ യോഗവും ചേരും. സ്കൂള് തുറക്കല് സംബന്ധിച്ച് വിവിധ വകുപ്പുകളുമായുള്ള ചര്ച്ചയും ധാരണയും ആയതായും മന്ത്രി കൂട്ടിച്ചേര്ത്തു.
സംസ്ഥാനത്ത് സ്കൂള് തുറക്കുന്നതിനോടനുബന്ധിച്ചുള്ള ബസ് സര്വ്വീസ് ക്രമീകരണത്തെക്കുറിച്ച് ഗതാഗതമന്ത്രിയും വിദ്യാഭ്യാസമന്ത്രിയും ഇന്ന് ചര്ച്ച നടത്തി തീരുമാനത്തിലെത്തും. കെഎസ്ആര്ടിസിയുടെ ബോണ്ട് സര്വ്വീസുകള് വേണമെന്ന് പല സ്കൂളുകളും ആവശ്യപ്പെട്ടിട്ടുണ്ട്. വിദ്യാര്ത്ഥികള്ക്കുള്ള കണ്സെഷന് നിരക്ക് സംബന്ധിച്ചും യോഗം ചര്ച്ച ചെയ്യും.
നിലവില് ആദ്യഘട്ടത്തില് വിദ്യാര്ത്ഥികളെ രണ്ട് വിഭാഗമായി തിരിച്ച് ആഴ്ചയില് മൂന്ന് ദിവസം മാത്രം ബാച്ച് തിരിച്ച് ഉച്ചവരെ ക്ലാസ് നടത്താനാണ് തീരുമാനം. സമാന്തരമായി ഓണ്ലൈന് വഴിയുള്ള ക്ലാസും തുടരും. അതുകൊണ്ടുതന്നെ സ്കൂളിലേക്ക് എത്തുന്ന കുട്ടികളുടെ എണ്ണം പരിമിതമായിരിക്കും. അക്കാദമിക് കാര്യങ്ങളില് പൊതുവിദ്യാഭ്യാസ സെക്രട്ടറിയും ഡയറക്ടറും കൂടിയാലോചന നടത്തി മാര്ഗ്ഗരേഖ തയ്യാറാക്കും.
