തിരുവനന്തപുരം: ട്രാവന്കൂറിന്റെ ഝാന്സി റാണി എന്ന് മഹാത്മാഗാന്ധിജി വിശേഷിപ്പിച്ച അക്കമ്മ ചെറിയാനെ മഹിളാമോര്ച്ച പ്രവര്ത്തകര് ആദരിച്ചു. 75-ാം സ്വാതന്ത്ര്യദിനത്തില് രാജ്യമാസകലം 75 വനിതാ സ്വാതന്ത്ര്യസമര സേനാനികളെയാണ് മഹിളാമോര്ച്ച ആദരിച്ചത്.
ഭാരതത്തിന്റെ തെക്കേ അറ്റത്തുനടന്ന പരിപാടിയുടെ ഭാഗമായിട്ടായിരുന്നു തിരുവനന്തപുരം വെള്ളയമ്പലത്ത് രാജ്ഭവന് സമീപമുള്ള അക്കമ്മ ചെറിയാന്റെ പ്രതിമയില് മഹിളാമോര്ച്ച ദേശീയ സെക്രട്ടറി പത്മജ മേനോന് പുഷ്പാര്ച്ചന നടത്തിയത്. ”ആദ്യം എന്റെ നേര്ക്ക് നിറയൊഴിക്കൂ… മറ്റുള്ളവരുടെ നേര്ക്ക് പിന്നെ” എന്ന് തോക്കേന്തിയ പോലീസുകാരോട് പറഞ്ഞ ധീരയായ വനിതയും സ്വാതന്ത്ര്യസമര നായികയുമായിരുന്നു അക്കമ്മ ചെറിയാനെന്ന് പത്മജാമേനോന് അഭിപ്രായപ്പെട്ടു.
ബിജെപി സംസ്ഥാന ഉപാധ്യക്ഷ പ്രൊഫ. വി.ടി. രമ, മഹിളാമോര്ച്ച സംസ്ഥാന ഉപാധ്യക്ഷ അഡ്വ. രൂപാ ബാലു, സംസ്ഥാന ജനറല് സെക്രട്ടറി രാകേന്ദു, വനിതാമോര്ച്ച ജില്ലാപ്രസിഡന്റ് ജയാരാജീവന്, ജനറല് സെക്രട്ടറി ശ്രീകല, വൈസ്പ്രസിഡന്റ് ജയശ്രീ തുടങ്ങിയവര് പങ്കെടുത്തു.
