ന്യൂദല്ഹി: സ്വാതന്ത്ര്യദിനാഘോഷത്തോടനുബന്ധിച്ച് പഞ്ചാബില് കോണ്ഗ്രസിനുള്ളിലെ ചേരിപ്പോര് വീണ്ടും പുറത്ത് വന്നു. മുഖ്യമന്ത്രി അമരീന്ദര് സിംഗും കോണ്ഗ്രസ് അധ്യക്ഷന് നവജ്യോത് സിദ്ദുവും വേറെ വേറെ ചടങ്ങുകള് നടത്തുകയായിരുന്നു.
ഞായറാഴ്ച അമൃതസറിലായിരുന്നു അമരീന്ദര് സിങ്ങ് പതാക ഉയര്ത്തിയത്. എന്നാല് ചണ്ഡീഗഢില് നടന്ന ഒരു സ്വാതന്ത്ര്യ ദിനച്ചടങ്ങളിലാണ് നവജോത് സിംഗ് സിദ്ദു പങ്കെടുത്തത്. വിവാദമായ മൂന്ന് കാര്ഷികനിയമങ്ങള് പിന്വലിക്കണമെന്നും അല്ലെങ്കില് കോണ്ഗ്രസ് എംഎല്എമാര് നിയമസഭയില് അത് ചെയ്യുമെന്നും കഴിഞ്ഞ ദിവസം സിദ്ദു മുഖ്യമന്ത്രി അമരീന്ദര്സിങ്ങിനെ വെല്ലുവിളിച്ചിരുന്നു.
വഴക്ക് കൂടുതല് വഷളാവുന്നതോടെ ഹൈക്കമാന്റ് പ്രശ്നത്തില് ഇടപെടുകയാണ്. ഇരുവര്ക്കുമിടയിലുള്ള പ്രശ്നങ്ങള് പറഞ്ഞുതീര്ക്കാന് പഞ്ചാബിന്റെ ചുമതലയുള്ള എഐസിസി നേതാവ് ഹരീഷ് റാവത്ത് അടുത്തയാഴ്ച പഞ്ചാബിലെത്തും. പഞ്ചാബ് നിയമസഭാ തെരഞ്ഞെടുപ്പിന് മുന്പ് ഇരുവര്ക്കുമിടയിലെ പ്രശ്നങ്ങള് പൂര്ണ്ണമായും തീര്ക്കാനാണ് ഹൈക്കമാന്റ് ശ്രമം.
