തൊടുപുഴ: ഓണവിപണി ലക്ഷ്യമിട്ട് തമിഴ്‌നാടൻ ബ്ലേഡ് മാഫിയ. ചെറുകിട വ്യാപാരികളെയാണ് സംഘം ലക്ഷ്യമിടുന്നത്. ബ്ലേഡ് മാഫിയ ഏജന്റുമാർ ജില്ലയിലെങ്ങും വ്യാപകമായിക്കൊണ്ടിരിക്കുകയാണ്.
കട്ടപ്പന, മൂന്നാർ, തൊടുപുഴ മുതലായ പ്രധാന നഗരങ്ങളിലും വിനോദസഞ്ചാര പ്രദേശങ്ങളിലെ ചെറുകിട വ്യാപാരികളെയും ലക്ഷ്യമിട്ടാണ് സംഘം ജില്ലയിലെങ്ങും എത്തിയിട്ടുള്ളത്. രണ്ടാം ലോൿഡൗണിനെ തുടർന്ന് ജില്ലയിലെ കച്ചവട മേഖലയിൽ വലിയ മാന്ദ്യം അനുഭവപ്പെട്ടതോടെ ചെറുകിട വ്യാപാരികൾ പലരും സാമ്പത്തിക പ്രതിസന്ധിയിലാണ്. ഓണക്കാലത്തെ കച്ചവടം കൊണ്ട് അതിനെ മറികടക്കാമെന്ന പ്രതീക്ഷയിലാണ് എല്ലാവരും. കടം വാങ്ങിയും കച്ചവടത്തിന് ഇറങ്ങുന്ന ഇത്തരം വ്യാപാരികളാണ് ബ്ലേഡ് മാഫിയയുടെ വലയിൽ കുടുങ്ങുന്നത്.
പത്തു മുതൽ പതിനഞ്ചു ശതമാനം വരെ പലിശയ്‌ക്കാണ് ഇവർ വായ്‌പ നൽകുന്നത്. ബ്ലേഡ് മാഫിയ സംഘത്തിൽ മലയാളികൾ ഉണ്ടെങ്കിലും കൂടുതലും തമിഴ്നാട്ടിൽ നിന്നുള്ളവരാണ്. ഏജന്റുമാരെ ഉപയോഗിച്ചാണ് ആവശ്യക്കാരെ കണ്ടെത്തുന്നത്. വായ്‌പ നൽകുന്ന പണത്തിന് അനുസരിച്ച് കമ്മിഷൻ കിട്ടുന്നതിനാൽ വ്യാപാരികളെക്കൊണ്ട് വലിയ തുക പലിശയ്‌ക്കെടുപ്പിക്കാനാണ് ഇടനിലക്കാരുടെ ശ്രമം.
പണം തിരിച്ചടയ്‌ക്കാൻ കഴിയാതെ വരുന്നതോടെ ഈടു നൽകിയത് ബ്ലേഡ് മാഫിയയുടെ കൈയിലാകും. ചെക്കുകൾ, റേഷൻ കാർഡ്, വാഹനങ്ങളുടെ ആർസി ബുക്ക് തുടങ്ങി വസ്തുവിന്റെ ആധാരംവരെ ഈടായി വാങ്ങിയാണ് പണം വായ്‌പ നൽകുന്നത്.
പലിശയും മുൻ‌കൂർ ഈടാക്കും. ഗഡുക്കളായി തിരിച്ചടയ്‌ക്കണമെന്നാണ് വ്യവസ്ഥ. തവണകളുടെ എണ്ണം കൂടുന്തോറും പലിശ ഇരട്ടിക്കും. വായ്‌പാ തുക തിരിച്ചടയ്‌ക്കാൻ വൈകിയാൽ ഗുണ്ടാ സംഘങ്ങളുമായി എത്തി ഭീഷണിയും ഈടു വസ്തുക്കൾ കൈക്കലാക്കാനും ശ്രമിക്കും. ജില്ലയിൽ നിത്യ സംഭവങ്ങളായി മാറിയിരിക്കുകയാണ്.
