തിരുവനന്തപുരം: കൊട്ടിയൂര് പീഡനക്കേസിലെ പ്രതിയും മുന്വൈദികനുമായ റോബിന് വടക്കുംഞ്ചേരിയെ പിന്തുണച്ച് സീറോ മലബാര് സഭാ മുന്വക്താവ് ഫാ. പോള് തേലക്കാട്ട്. തികച്ചും അസാധാരണമായ കേസാണിത്, സാധാരണ ഒരു കേസ് ഇങ്ങനെ ഉണ്ടാകാറില്ലന്ന് അദേഹം പറഞ്ഞു. ഇര തന്നെയാണ് കേസുമായി സുപ്രീം കോടതിയില് എത്തിയത്. ചെയ്തത് തെറ്റല്ലെന്നോ അവരെ ശിക്ഷിക്കേണ്ടെന്നോ അല്ല താന് പറയുന്നത്. മറിച്ച് തെറ്റിന് അതീതമായി ചില സാധ്യതകളുണ്ട്. ആ സാധ്യതകളുമായി കോടതിയുടെ മുന്നിലെത്തുന്ന ഒരാളുടെ കഥയാണ് ഈ കേസ്. നീതി നടത്താനുള്ളതാണ് നിയമം. നിയമത്തിന് അതീതമായി മനുഷ്യജീവിതത്തിന് സാധ്യതയുണ്ടെന്ന് ചൂണ്ടിക്കാണിക്കുന്ന കാര്യമാണ് ഈ കേസെന്നും റിപ്പോര്ട്ടര് ടിവി ചാനലില് നടന്ന ചര്ച്ചയില് ഫാ. പോള് തേലക്കാട്ട് പറഞ്ഞു.
കേസ് കോടതി ഫയലില് സ്വീകരിച്ചതു തന്നെ ഹര്ജിയുടെ പ്രാധാന്യം പരിഗണിച്ചാണെന്ന് വൈദികന് പറഞ്ഞു. ‘നിയമത്തിന്റെ മണ്ഡലത്തിനു പുറത്തേയ്ക്ക് ഒരു ജീവിതമുണ്ട് കുറ്റവും ശിക്ഷയും മാത്രമല്ല ജീവിതം, അതിനപ്പുറവും ജവിതമുണ്ട്. ആ കാര്യങ്ങളും കോടതികള് പരിഗണിക്കേണ്ടതുണ്ടെന്നും അദേഹം വ്യക്തമാക്കി.
അതേസമയം, വിവാഹം കഴിക്കാനായി ജാമ്യം തേടിക്കൊണ്ടുള്ള കൊട്ടിയൂര് പീഡനക്കേസ് പ്രതി റോബിന് വടക്കുചേരിയുടേയും ഇരയുടേയും ഹര്ജി കഴിഞ്ഞ ദിവസം സുപ്രീംകോടതി തള്ളിയിരുന്നു. ജസ്റ്റിസ്മാരായ വിനീത് ശരണ്, ദിനേശ് മഹേശ്വരി എന്നിവരടങ്ങുന്ന ഡിവിഷന് ബെഞ്ചാണ് ഹര്ജി തള്ളിയത്. വിവാഹക്കാര്യത്തില് ഇരുവര്ക്കും ഹൈക്കോടതിയെ സമീപിക്കാമെന്നും ഹര്ജി തള്ളിക്കൊണ്ട് കോടതി പറഞ്ഞു. വിവാഹംകഴിക്കുന്നതിനായി ജാമ്യം അനുവദിക്കണമെന്ന് ആവശ്യപ്പെട്ട് സമര്പ്പിച്ച ഹര്ജികളെ കേരളം സുപ്രീം കോടതിയില് എതിര്ത്തിരുന്നു.
റോബിന് വടക്കുംചേരിയെ വിവാഹം കഴിക്കാന് അനുമതി തേടി ഇരയും കഴിഞ്ഞ ദിവസം സുപ്രീം കോടതിയില് ഹര്ജി സമര്പ്പിച്ചതിനു പിന്നാലെയാണ് കൊട്ടിയൂര് പീഡനക്കേസില് ബലാത്സംഗത്തിന് ഇരയായ പെണ്കുട്ടിയെ വിവാഹം കഴിക്കാന് അനുവദിക്കണമെന്നാവശ്യപ്പെട്ട് മുന് വൈദികന് റോബിന് വടക്കുചേരി സുപ്രീംകോടതിയില് അപേക്ഷ നല്കിയത്. രണ്ടു മാസത്തെ ജാമ്യമാണ് റോബിന് ആവശ്യപ്പെട്ടിരുന്നത്. എന്നാല്, വിവാഹം കഴിക്കണം എന്ന ആവശ്യത്തെ സര്ക്കാര് എതിര്ത്തില്ല എന്നാല് ജാമ്യം അനുവദിക്കരുതെന്ന് സര്ക്കാരിന് വേണ്ടി ഹാജരായ ഹരിന് പി റാവല് വാദിച്ചു.
നാല് വയസ്സുള്ള മകനെ സ്കൂളില് ചേര്ക്കുമ്പോള് അച്ഛന്റെ പേര് രേഖപെടുത്തുന്നതിന് വിവാഹം അനിവാര്യമാണെന്ന് വ്യക്തമാക്കിയാണ് ഇര സുപ്രീം കോടതിയെ സമീപിച്ചിത്. രണ്ടു ഹര്ജികളും ഒന്നിച്ചാണ് പരിഗണിച്ചത്. വിവാഹത്തിനായി ജാമ്യം അനുവദിക്കണമെന്ന റോബിന് വടക്കുംചേരിയുടെ ആവശ്യം നേരത്തെ ഹൈക്കോടതി തള്ളിയിരുന്നു. ജാമ്യം അനുവദിക്കുന്നത് വിവാഹത്തിന് നേരിട്ടോ അല്ലാതെയോ നിയമാനുമതി നല്കുന്നതുപോലെയാകും. അതിനാല് ഈ വിഷയത്തില് അഭിപ്രായമൊന്നും രേഖപ്പെടുത്താതെ അകന്നു നില്ക്കുയാണെന്നാണ് ഹൈക്കോടതി ജാമ്യ അപേക്ഷ തള്ളിക്കൊണ്ട് വ്യക്തമാക്കിയിരുന്നത്. ഇതിന് എതിരെയാണ് റോബിന് വടക്കുംചേരി സുപ്രീം കോടതിയെ സമീപിച്ചത്.
2016 ലായിരുന്നു കേസിനാസ്പദമായ സംഭവം. കൊട്ടിയൂര് നീണ്ടുനോക്കി സെയിന്റ് സെബാസ്റ്റ്യന്സ് പള്ളി വികാരി ആയിരുന്ന റോബിന് വടക്കുംചേരി പള്ളിമേടയില് വെച്ച് പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച് ഗര്ഭിണിയാക്കിയെന്നാണ് കേസ്. 2017 ഫെബ്രുവരിയില് പെണ്കുട്ടി ഒരു കുഞ്ഞിനും ജന്മംനല്കി. പീഡന കേസില് റോബിന് വടക്കുംചേരിക്ക് മൂന്ന് വകുപ്പുകളിലായി അറുപത് വര്ഷത്തെ കഠിനതടവ് ആണ് തലശ്ശേരി പോക്സോ കോടതി വിധിച്ചത്. എന്നാല് മൂന്ന് ശിക്ഷയും ഒരുമിച്ച് 20 വര്ഷത്തെ കഠിന തടവ് അനുഭവിച്ചാല് മതി.
