പത്തനംതിട്ട: സിപിഎം ലോക്കല്‍ കമ്മിറ്റി സെക്രട്ടറിക്കെതിരെ പീഡനശ്രമ പരാതിയുമായി വനവാസി യുവതി. വെച്ചൂച്ചിറ-കൊല്ലമുള സിപിഎം ലോക്കല്‍ സെക്രട്ടറി ജോജി മഞ്ചാടിക്കെതിരെയാണ് യുവതി പത്തനംതിട്ട-വെച്ചുച്ചിറ പോലീസില്‍ പരാതി നല്‍കിയത്. അശ്ലീല ചുവയോടെ ഫോണില്‍ വിളിച്ച് ശല്യപ്പെടുത്തുന്നത് തുടര്‍ന്നതോടെയാണ് യുവതി പോലീസിനെ സമീപിച്ചത്. ജോജി മഞ്ചാടി പീഡിപ്പിക്കാന്‍ ശ്രമിച്ചുവെന്ന് യുവതി പരാതിയില്‍ പറയുന്നു.
പ്രവര്‍ത്തകരുടെ സ്ത്രീ വിരുദ്ധ നടപടികളില്‍ പൊറുതിമുട്ടിയ സിപിഎം നേതൃത്വത്തിന് വലിയ പ്രതിസന്ധിയാണ് പുതിയ പരാതി. വനവാസി യുവതിയാണ് പരാതിക്കാരി എന്നത് സംഭവത്തിന്റെ ഗൗരവം വര്‍ധിപ്പിക്കുന്നു. മൂന്ന് കുട്ടികളുള്ള യുവതിയുടെ ഭര്‍ത്താവ് കണ്ണൂരിലാണ് ജോലി ചെയ്യുന്നത്. സംഭവം പുറത്ത് പറഞ്ഞതോടെ സിപിഎമ്മുകാര്‍ യുവതിയെ ഭീഷണിപ്പെടുത്തി. തനിക്കും കുടുംബത്തിനും ഭീഷണിയുള്ളതായും യുവതി പരാതിയില്‍ പറയുന്നു. ജോജിയുടെ ഭരണസ്വാധീനം ഭയന്നാണ് പരാതി നല്‍കാന്‍ യുവതി മടിച്ചത്. ഇയാളുടെ ഫോണ്‍ സംഭാഷണം റെക്കോഡ് ചെയ്തതും യുവതി തെളിവായി പോലീസിന് നല്‍കിയിട്ടുണ്ട്.
