തിരുവനന്തപുരം: കെപിസിസി പ്രസിഡന്റ് കെ. സുധാകരന്റെ പ്രസ്താവനയ്‌ക്കെതിരെ മുഖ്യമന്ത്രി പിണറായി വിജയന് കഴിഞ്ഞദിവസം വാര്‍ത്താ സമ്മേളനത്തില്‍ മറുപടി നല്‍കിയത് പാര്‍ട്ടി തീരുമാനപ്രകാരം. ആരോപണങ്ങള്‍ ഉന്നയിക്കുന്നവര്‍ക്ക് അതേ നാണയത്തില്‍ തന്നെ തിരിച്ച് മറുപടി നല്‍കാനാണ് സിപിഎം തീരുമാനം. ഇതിന്റ ഭാഗമായി വിശകമായി എഴുതി തയ്യാറാക്കിയ മറുപടിയാണ് പിണറായി നല്‍കിയതെന്നാണ് റിപ്പോര്‍ട്ടുകള്‍.
ബ്രണ്ണന്‍ കോളേജ് പഠനകാലം സംബന്ധിച്ച് സ്വകാര്യ മാധ്യനത്തിന് നല്‍കിയ അഭിമുഖത്തിലാണ് ഇക്കാര്യം അറിയിച്ചത്. പിണറായിയെ ഒറ്റച്ചവിട്ടിന് സുധാകരന് താഴെയിട്ടതായും ലേഖനത്തില്‍ പറയുന്നുണ്ട്. ലേഖനം പുറത്തുവന്നതിന് പിന്നാലെ ആരോപണത്തിന് അതിരൂക്ഷമായി തന്നെ മറുപടി നല്‍കാന്‍ സിപിഎം സംസ്ഥാന നേതൃത്വം ഒറ്റക്കെട്ടായി തീരുമാനമെടുത്തതാണെന്നും സൂചനയുണ്ട്.
വ്യക്തിപരമായി ഉന്നയിക്കുന്ന ആരോപണങ്ങളോട് ഒന്നിനോട് പോലും വിട്ടുവീഴ്ചയുണ്ടാകില്ല. പഠനകാലയളവില്‍ സംഭവിച്ചതെന്തെന്ന് വിശദീകരിക്കുക മാത്രമാണ് മുഖ്യമന്ത്രി ചെയ്തത്. ഉയര്‍ന്നുവരുന്ന ആക്ഷേപങ്ങള്‍ക്ക് അപ്പോള്‍ തന്നെ മറുപടി നല്‍കും. ജനങ്ങള്‍ക്ക് കാര്യങ്ങള്‍ മനസ്സിലാക്കി കൊടുക്കാനാണ് ഇതെന്നാണ് പാര്‍ട്ടി വിശദീകരണം നല്‍കിയിരിക്കുന്നത്.
