ന്യൂദല്ഹി : ഭീകരസംഘടനയായ ഇസ്ലാമിക് സ്റ്റേറ്റില് ചേരാനായി നാടുവിട്ടവരെ ഇന്ത്യയിലേക്ക് തിരിച്ചുകൊണ്ടുവരുന്നത് സുരക്ഷാ ഭീഷണിയെന്ന് രഹസ്യാന്വേഷണ ഏജന്സി റിപ്പോര്ട്ട്. ചാവേര് അക്രമണത്തിന് ഉള്പ്പടെ ഇസ്ലാമിക് സ്റ്റേറ്റ് സ്ത്രീകള്ക്ക് പരിശീലനം നല്കിയിട്ടുണ്ട്. അതിനാല് ഇന്ത്യയിലക്ക് ഇവരെ തിരിച്ചു കൊണ്ടുവരുന്നത് സുരക്ഷയ്ക്ക് ഭീഷണിയാണെന്നാണ് രഹസ്യാന്വേഷണ ഏജന്സി മറുപടി നല്കിയിരിക്കുന്നത്.
സോണിയ, മെറിന്, നിമിഷ ഫാത്തിമ, റഫീല എന്നീ മലയാളി യുവതികളാണ് അഫ്ഗാന് ജയിലില് നിലവില് കഴിയുന്നത്. ഐഎസില് ചേരാനായി നാടുവിട്ടതാണ് ഇവര്. എന്നാല് ഇവരെ തിരിച്ചുകൊണ്ടുവരുന്നത് രാജ്യ സുരക്ഷയ്ക്ക് തന്ന ഭീഷണിയായതിനാല് തിരികെ എത്തിക്കേണ്ട എന്നാണ് കേന്ദ്ര സര്ക്കാരിന്റെ നിലപാട്. വിഷയം കോടതിയില് എത്തിയാല് നിയമപരമായി നേരിടാനും സര്ക്കാര് തീരുമാനിച്ചിട്ടുണ്ട്.
ഐഎസില് ചേര്ന്നവരെ തിരികെ കൊണ്ടുവരണമെന്ന് മുന് അംബാസഡര് കെ.പി. ഫാബിയനും ആവശ്യപ്പെട്ടിരുന്നു. ഇവരെ മടക്കികൊണ്ടുവരാതിരിക്കാന് നിയമപരമായി കാരണമില്ലെന്നും രാജ്യത്ത് കസ്റ്റഡിയിലിരിക്കും എന്നതിനാല് മറ്റ് ആശങ്കകള്ക്ക് അടസ്ഥാനമില്ലെന്നുമായിരുന്നു ഫാബിയന് പറഞ്ഞത്.
ഭര്ത്താക്കന്മാര്ക്കൊപ്പം 2016-17 സമയത്ത് ഇന്ത്യ വിട്ട് ഐഎസില് ചേരാന് പോയവരാണ് ഇവര്. ആദ്യം ഇറാനിലെത്തിയ ഇവര് അവിടെ നിന്നും അഫ്ഗാനിസ്ഥാനിലെ ഖ്വാറേഷ്യന് പ്രവിശ്യയിലെത്തുകയായിരുന്നു. പിന്നീട് അമേരിക്കന് വ്യോമസേന നടത്തിയ മിസൈലാക്രമണത്തില് ഈ നാല് പേരുടേയും ഭര്ത്താക്കന്മാര് കൊല്ലപ്പെട്ടു. തുടര്ച്ചയായ ആക്രമണത്തില് ഐഎസ് ഛിന്നഭിന്നമായതോടെ സ്ത്രീകളും കുട്ടികളുമടക്കം ഐഎസ് കേന്ദ്രങ്ങളിലുണ്ടായിരുന്ന 403 പേര് അഫ്ഗാനിസ്ഥാന് സര്ക്കാരിന് മുന്നില് കീഴടങ്ങി. ഇന്ത്യയടക്കം 13 രാജ്യങ്ങളില് നിന്നുള്ളവര് ഈ സംഘത്തിലുണ്ടായിരുന്നു.
