തിരുവനന്തപുരം: എന്‍ എന്‍ ജി ഫിലിംസിന്റെ ബാനറില്‍ നിരുപ് ഗുപ്ത നിര്‍മ്മിക്കുന്ന ബോളിവുഡ് ചിത്രമായ’ പട്ടാ’ യില്‍ പ്രശസ്ത മലയാളി ക്രിക്കറ്റര്‍ ശ്രീശാന്ത് നായകനാകുന്നു. ചിത്രത്തിന്റെ രചനയും സംവിധാനവും നിര്‍വ്വഹിക്കുന്നത് തെന്നിന്ത്യന്‍ സംവിധായകന്‍ ആര്‍ രാധാകൃഷ്ണനാണ്.
ആക്ഷനും സംഗീതത്തിനും പ്രാധാന്യമുള്ള ഒരു പൊളിറ്റിക്കല്‍ ത്രില്ലറാണ് പട്ടാ. ‘ഇന്നേവരെ ആരും പറഞ്ഞിട്ടില്ലാത്ത, പുതുമയുള്ള, എക്‌സ്പരിമെന്റലായ ഒരു പൊളിറ്റിക്കല്‍ ത്രില്ലര്‍ മൂവിയാണ് ‘പട്ടാ’. സുമുഖനും സുന്ദരനും ബുദ്ധിമാനും അടുത്തത് എന്താണ് പ്രവര്‍ത്തിക്കാന്‍ പോകുന്നതെന്ന് സഹപ്രവര്‍ത്തകര്‍ക്ക് പിടി കൊടുക്കാത്ത ഒരു സി ബി ഐ ഓഫീസറാണ് നായകന്‍.
ഈ കഥാപാത്രമാകുവാന്‍ പലരെയും ഞാന്‍ മനസ്സില്‍ ആലോചിച്ചെങ്കിലും എന്റെ അന്വേഷണം ശ്രീശാന്തിലെത്തുകയായിരുന്നു. കഥ കേട്ടയുടന്‍ തന്നെ ഇതിലെ സി ബി ഐ ഓഫീസറാകാന്‍ ശ്രീശാന്ത് നിറഞ്ഞ സന്തോഷത്തോടെ സമ്മതം മൂളുകയായിരുന്നു. എന്നുമാത്രമല്ല ആ ക്യാരക്ടറിന്റെ ചില ഷെയ്ഡുകള്‍ അദ്ദേഹം അഭിനയിച്ചു കാണിക്കുകയും ചെയ്തു.
പ്രതീക്ഷിക്കുന്നതിനുമപ്പുറം അദ്ദേഹമീ കഥാപാത്രത്തെ ഉജ്ജ്വലമാക്കുമെന്ന് എനിക്കുറപ്പുണ്ട്. എല്ലാ വിഭാഗത്തിലുമുള്ള പ്രേക്ഷകരെയും പിടിച്ചിരുത്തത്തക്കതായ പുതുമയുള്ളൊരു എലിമെന്റ് പട്ടായുടെ ഹൈലൈറ്റാണന്ന് ഞാന്‍ ഉറപ്പ് തരുന്നു ……’ പട്ടായുടെ സംവിധായകന്‍ ആര്‍ രാധാകൃഷ്ണന്റെ ആത്മവിശ്വാസം നിറഞ്ഞ വാക്കുകള്‍ .
ശ്രീശാന്തിനൊപ്പം ബോളിവുഡ്ഡിലെ പ്രമുഖ താരങ്ങളും അഭിനയിക്കുന്നു.നിര്‍മ്മാണം – നിരുപ് ഗുപ്ത, ഛായാഗ്രഹണം – പ്രകാശ്കുട്ടി, എഡിറ്റിംഗ് – സുരേഷ് യു ആര്‍ എസ് , സംഗീതം – സുരേഷ് പീറ്റേഴ്‌സ്, സ്‌പോട്ട് എഡിറ്റിംഗ് – രതിന്‍ രാധാകൃഷ്ണന്‍ , കോറിയോഗ്രാഫി – ശ്രീധര്‍ , കല-സജയ് മാധവന്‍, ഡിസൈന്‍സ് – ഷബീര്‍, പി ആര്‍ ഓ -അജയ് തുണ്ടത്തില്‍ .പട്ടായുടെ ചിത്രീകരണം ഉടന്‍ ആരംഭിക്കും.
