എസ്. കൃഷ്ണകുമാര്
മട്ടാഞ്ചേരി: ലക്ഷദ്വീപ് ജനതയ്ക്ക് ആവേശം പകര്ന്ന് ദ്വീപില് നിന്ന് ജപ്പാനിലേക്ക് ആദ്യ ചൂര കയറ്റുമതി. ശനിയാഴ്ച അഗത്തിയില് നിന്നുള്ള ആദ്യ ചൂര കയറ്റുമതി കണ്ടെയ്നര് ബെംഗളൂരുവിലെത്തി. അവിടെ നിന്നാണ് ജപ്പാനിലേക്ക് കയറ്റുമതി ചെയ്യുക. ബെംഗളൂരുവിലെ ഷഷ്നി ഫുഡ് പ്രൈവറ്റ് ലിമിറ്റഡ് എന്ന കമ്പനിയാണ് ലക്ഷദ്വീപ് ചൂര ജപ്പാനിലെ ടോക്കിയോവിലെത്തിക്കുക. ആദ്യഘട്ടമായി അഞ്ച് ടണ് ചൂരയാണ് കയറ്റുമതി ചെയ്തത്. ബെംഗളൂരുവില് നിന്ന് ദ്വീപിലേക്ക് ചരക്ക് എത്തിക്കുന്ന എയര് ഇന്ത്യ ചരക്ക് വിമാനം മടങ്ങുമ്പോഴാണ് കയറ്റുമതിക്കുള്ള ചൂര കണ്ടെയ്നറുകള് അയയ്ക്കുന്നത്.
ജൈവ സമ്പൂര്ണമായ ദ്വീപ് സമൂഹങ്ങളിലെ ചൂര മത്സ്യം ജപ്പാന്, ജര്മ്മന് വിപണികളില് ഏറെ പ്രിയമുള്ളവയാണ്. കഴിഞ്ഞ വര്ഷം കൊച്ചിയില് നടന്ന മെഗാ ലക്ഷദ്വീപ് ട്യൂണ എക്സ്പോര്ട്ടേഴ്സ് സ്റ്റേക്ക് ഹോള്ഡേഴ്സ് മീറ്റാണ് കയറ്റുമതി സാധ്യതകള് തുറന്നത്. അമ്പതോളം കയറ്റുമതിക്കാരാണ് ഇതില് പങ്കെടുത്തത്. ബെംഗളൂരു കമ്പനിക്ക് പിന്നാലെ കൂടുതല് കമ്പനികള് ദ്വീപ് ചൂര കയറ്റുമതിക്കായി കാത്തിരിക്കുന്നു. മുപ്പത്താറോളം ദ്വീപുകളില് ജനവാസമുള്ള പത്ത് ദ്വീപുകളിലായി രണ്ടായിരത്തോളം യാനങ്ങളും ഏഴായിരത്തിലേറെ മത്സ്യത്തൊഴിലാളികളും രജിസ്റ്റര് ചെയ്തിട്ടുണ്ട്.
ഇവിടത്തെ സൊസൈറ്റികളുമായി സഹകരിച്ചാണ് കയറ്റുമതി പ്രവര്ത്തനം. ചൂര സംഭരണത്തിനും സൂക്ഷിപ്പിനുമായി അഗതി, മിനികോയ്, അമിനി ദ്വീപുകളില് ജര്മ്മന് സാങ്കേതികവിദ്യയോടെയുള്ള കണ്ടെയ്നര് ഐസ് പ്ലാന്റുകള് സജ്ജീകരിച്ചിട്ടുണ്ട്. തൊഴിലാളികള്ക്ക് പ്രത്യേക പരിശീലനവും നല്കിയിട്ടുണ്ട്.
ദ്വീപില് നിന്നുള്ള ചൂര കയറ്റുമതി ലക്ഷദ്വീപില് ഒട്ടെറെ തൊഴിലവസരത്തിനും സാമ്പത്തിക നേട്ടത്തിനുമിടയാക്കുമെന്നാണ് വിലയിരുത്തല്. കാലവര്ഷത്തില് ചരക്ക് വിമാനം വഴി കൂടുതല് ചൂര കയറ്റുമതി നടത്താനും സെപ്തംബറോടെ കയറ്റുമതിക്കായി പ്രത്യേക കപ്പല് സംവിധാനമൊരുക്കാനുമാണ് ലക്ഷ്യമിടുന്നത്. ചൂര കയറ്റുമതി ദ്വീപിന്റെ വികസന സാധ്യതകള്ക്ക് കരുത്തേകുമെന്നാണ് മത്സ്യ കയറ്റുമതി വൃത്തങ്ങളില് നിന്നുള്ള വിവരം.
