തിരുവനന്തപുരം: അന്തര്‍ദേശീയ, ദേശീയ പുരസ്‌കാരങ്ങള്‍ നേടിയ ബിരിയാണി എന്ന ചിത്രത്തിലെ രംഗങ്ങള്‍ ലൈംഗികദൃശ്യങ്ങള്‍ എന്ന പേരില്‍ പ്രചരിപ്പിക്കുന്നുവെന്ന പരാതിയുമായി നടന്‍. ബിരിയാണിയില്‍ പ്രധാന വേഷം അവതരിപ്പിച്ച തോന്നയ്‌ക്കല്‍ ജയചന്ദ്രനാണ് ഇതിനെതിരെ രംഗത്തെത്തിയത്. കനി കുസൃതി അവതരിപ്പിച്ച ചിത്രത്തിലെ പ്രധാന കഥാപാത്രമായ ഖദീജയുടെ ഭര്‍ത്താവിന്റെ റോളിലാണ് ജയചന്ദ്രന്‍ എത്തിയത്.
‘ബിരിയാണിയില്‍ വളരെ പ്രധാനപ്പെട്ട വേഷമാണ് ചെയ്തത്, എന്നാല്‍ ചിത്രം ഒടിടി റിലീസ് ആയതിന് പിന്നാലെ, ചിത്രത്തിലെ ചില രംഗങ്ങള്‍ മാത്രം ചിലര്‍ സോഷ്യല്‍ മീഡിയ വഴിയും, വാട്ട്സ്ആപ്പ് വഴിയും പ്രചരിപ്പിക്കാന്‍ ആരംഭിച്ചെന്ന് ജയചന്ദ്രന്‍. ലൈംഗിക ദൃശ്യങ്ങള്‍ എന്ന നിലയിലാണ് പലതും വളരെ മോശം കമന്റുകളോടെ പ്രചരിപ്പിക്കുന്നത്. സിനിമ സംബന്ധിച്ച പോസ്റ്റുകള്‍ക്ക് അടിയില്‍ പോലും ഇത്തരം പ്രചാരണം നടത്തുന്നു. ബിരിയാണി എന്ന ചിത്രം കണ്ടവര്‍ക്ക് ഈ രംഗങ്ങള്‍ എന്താണ് എന്ന് അറിയാം, ശരിക്കും ഈ ചിത്രം കാണാത്ത വലിയൊരു വിഭാഗം ജനങ്ങളുണ്ട്. അവരിലേക്കാണ് ഈ രംഗങ്ങള്‍ എത്തിയത്. അതില്‍ എന്റെ നാട്ടുകാരും ബന്ധുക്കളും അടക്കമുണ്ട്’
‘ഒരു നാട്ടിന്‍പുറത്താണ് ഞാന്‍ ജീവിക്കുന്നത്. അവിടുത്തെ ഭൂരിപക്ഷത്തിനും ഞാന്‍ ഒരു സിനിമയില്‍ അഭിനയിച്ചതാണ് എന്നത് അറിയില്ല. ഇത്തരം രംഗങ്ങള്‍ ലഭിച്ചവര്‍ ആ രീതിയില്‍ അതിനെ കാണുന്നില്ല. ഞാന്‍ വേറെ എന്തോ കെണിയില്‍ പെട്ടു, അത് ചിത്രീകരിക്കപ്പെട്ടുവെന്നാണ് സംസാരം, ശരിക്കും സങ്കടകരമായ കാര്യമാണ് ഇത്. നല്ലൊരു ചിത്രം ചെയ്തിട്ടും അത് ഇത്തരത്തില്‍ വ്യാഖ്യാനിക്കപ്പെടുന്നത് തീര്‍ത്തും സങ്കടകരമാണ്’
ഇക്കാര്യത്തില്‍ നിയമനടപടിയിലേക്ക് നീങ്ങുകയാണെന്ന സൂചനയും ജയചന്ദ്രന്‍ നല്‍കി. 25 വര്‍ഷത്തിലേറെയായി നാടകവേദിയില്‍ സജീവമായുള്ള ജയചന്ദ്രന്‍ റിയാലിറ്റി ഷോകളിലൂടെയും കോമഡി ഷോകളിലൂടെയും മിനിസ്‌ക്രീനിലും സുപരിചിതനാണ്
