ന്യൂദല്ഹി : കോവിഡ് രണ്ടാം തരംഗത്തില് ഇന്ത്യയ്ക്ക് വീണ്ടും സഹായവുമായി റഷ്യ. 1,50,000 ഡോസ് വാക്സിന് കൂടി ഇന്ത്യയ്ക്കായി എത്തിക്കാനുള്ള നടപടികള് ആരംഭിച്ചു കഴിഞ്ഞു. ഡോ. റെഡ്ഡീസ് ലബോറട്ടറിയുമായി സഹകരിച്ചാണ് വാക്സിന് ഇന്ത്യയിലെത്തിക്കുന്നത്. ഈ മാസം അവസാനത്തോടെ 30 ലക്ഷം ഡോസ് വാക്സിനും ഹൈദരാബാദില് എത്തും. നേരത്തെ സ്പുട്നിക് വി കോവിഡ് വാക്സിന്റെ ആദ്യ ബാച്ച് ഈമാസം ഒന്നിന് ഇന്ത്യയില് എത്തിയിരുന്നു.
വാക്സിന് പുറമേ നാല് ഇടത്തരം ഓക്സിജന് ട്രക്കുകളും റഷ്യ അയക്കുമെന്നാണ് ന്യൂദല്ഹിയിലേയും മോസ്കോയിലേയും നയതന്ത്ര ഉദ്യോഗസ്ഥര് അറിയിച്ചിട്ടുണ്ട്. ഈ ട്രക്കുകള്ക്ക് മണിക്കൂറില് 70 കിലോ ഗ്രാം ഓക്സിജനും പ്രതിദിനം 50,000 ലിറ്ററും ഉത്പ്പാദിപ്പിക്കാന് സാധിക്കും. അതിനാല് തന്നെ ഇവയുള്ള ആശുപത്രിയില് ഓക്സിജന്റെ കുറവുണ്ടാകില്ല.
18 മുതല് 44 വയസ്സുവരെയുള്ളവര്ക്കായി ഇന്ത്യ വാക്സിന് കുത്തിവെപ്പ് ആരംഭിച്ച മെയ് ഒന്നിനാണ് ആദ്യ ബാച്ച് വാസ്കിന് എത്തിയത്. 150,000 ഡോസ് സ്പുട്നിക് വാക്സിനാണ് അന്ന് എത്തിയത്. കോവിഡിനെതിരേ 90 ശതമാനത്തിലധികം ഫലപ്രാപ്തിയുള്ള സ്പുട്നിക്കിന് ഏപ്രില് 12-ന് ഇന്ത്യയില് അടിയന്തിര ഉപയോഗത്തിന് അനുമതി നല്കിയിരുന്നു.
കോവിഷീല്ഡിനും കോവാക്സിനും ശേഷം ഇന്ത്യയില് ഉപയോഗിക്കാന് അനുമതി ലഭിക്കുന്ന മൂന്നാമത്തെ വാക്സിനാണ് റഷ്യയുടെ സ്പുട്നിക്-വി. 91.6 ശതമാനം കാര്യക്ഷമത സ്പുട്നിക് വാക്സിനിനുള്ളതെന്നാണ് റിപ്പോര്ട്ടുകള്.
