പറവൂര്: വാക്സിനേഷന്റെ ആദ്യ നാളുകളില് ആദ്യ ഡോസ് സ്വീകരിച്ച മുനിസിപ്പല് പ്രദേശത്തുള്ളവര്ക്ക് രണ്ടാം ഡോസ് ലഭിക്കുന്നതില് കാലതാമസം നേരിടുന്നതായി വ്യാപക പരാതി. നഗരസഭയുടെ നിയന്ത്രണത്തിലുള്ള താലൂക്ക് ആശുപത്രിയില് ഇതിന് വേണ്ട ക്രമീകരണങ്ങള് ഒരുക്കുന്നതില് അധികൃതര് വരുത്തുന്ന വിഴ്ചയാണ് അനാസ്ഥക്ക് പ്രധാന കാരണം. 45 വയസ് കഴിഞ്ഞവര്ക്ക് നഗരസഭ മുന്കൈയെടുത്ത് രംഗനാഥ് ആഡിറ്റോറിയത്തില് വച്ച് സംഘടിപ്പിച്ച മെഗാ വാക്സിനേഷന് ക്യാമ്പില് 3000 പേരും നഗരത്തിലെ സ്വകാര്യ ആശുപത്രികളില് ഏകദേശം 2000 പേരും ആദ്യ ഡോസ് വാക്സിന് എടുത്തിരുന്നു.
കോവിഷീല്ഡ് വാക്സിനാണ് ഇതില് ഭൂരിഭാഗം പേരും എടുത്തത്. ഇങ്ങനെ എടുത്തവര്ക്ക് രണ്ടാം ഡോസ് സ്വീകരിക്കാനുള്ള സമയപരിധിയില് കോവിഷീല്ഡ് വാക്സിന് പകരം കോ വാക്സിനാണ് ലഭ്യമായിരുന്നത്. ഇതു മൂലം ഏറെ പേര്ക്ക് രണ്ടാം ഡോസ് എടുക്കാനായിട്ടില്ല. സമീപ പഞ്ചായത്തുകളിലുള്ളവര്ക്ക് പ്രദേശങ്ങളിലെ പ്രാഥമികാരോഗ്യ കേന്ദ്രങ്ങളില് വാക്സിനേഷന് മതിയായ സൗകര്യം ഒരുക്കിയിട്ടുണ്ട്.
മുനിസിപ്പല് പ്രദേശത്തുള്ളവരുടെ ഏക ആശ്രയം താലൂക്ക് ആശുപത്രിയാണ്. ഇവിടെ വേണ്ട പരിഗണന നഗരവാസികള്ക്ക് ലഭിക്കുന്നിലെന്നാണ് ആക്ഷേപം. നഗരസഭ ഇക്കാര്യത്തില് വേണ്ടത്ര ഇടപെടുന്നില്ലെന്നും, നഗരവാസികള്ക്ക് താലൂക്ക് ആശുപത്രിയില് പ്രഥമ പരിഗണന നല്കണമെന്നും ചൂണ്ടിക്കാട്ടി നഗരസഭ പ്രതിപക്ഷ നേതാവ് ടി.വി. നിഥിന് ജില്ലാ കളക്ടര്, ഡിഎംഒ എന്നിവര്ക്ക് കത്ത് നല്കി. അര്ഹരായവര്ക്ക് അടിയന്തരമായി രണ്ടാം ഡോസ് വാക്സിന് നല്കണമെന്നും അദ്ദേഹം ആവശ്യപ്പെട്ടു. വാക്സിന് ലഭ്യമാകുന്ന മുറയ്ക്ക് രണ്ടാം ഡോസിന് അര്ഹരായ 29 വാര്ഡുകളിലുള്ളവരുടെയും മുന്ഗണന ലിസ്റ്റ് തയാറാക്കി ടേണ് നിശ്ചയിച്ച് ആവശ്യമായ ക്രമീകരണങ്ങള് ഉടന് സ്വീകരിക്കുമെന്ന് ആശുപത്രി സൂപ്രണ്ട് ഉറപ്പു തന്നതായും നിഥിന് പറഞ്ഞു.
