കൊച്ചി: പോലീസ് കസ്റ്റഡിയില് നിന്ന് ഓടി രക്ഷപ്പെട്ട യുവാവ് വൈദ്യുത കമ്പയിലേയ്ക്ക് വീണ് മരിച്ചു. പാലക്കാട് ഒറ്റപ്പാലം സ്വദേശി രഞ്ജിത്താണ് ഷോക്കേറ്റ് മരിച്ചത്. ഇന്നലെ വൈകിട്ട് ആറ് മണിയോടെ എറണാകുളം കെഎസ്ആര്ടിസി സ്റ്റാന്ഡിന് സമീപത്താണ് സംഭവം.
കഞ്ചാവുമായി പിടിയിലായ യുവാവിനെ പോലീസ് അറസ്റ്റ് ചെയ്ത് സ്റ്റേഷനില് എത്തിച്ച് മഹസര് തയാറാക്കുന്നതിനിടെയാണ് യുവാവ് പോലീസ് കസ്റ്റഡിയില്നിന്ന് ഓടിയത്.
യുവാവ് കഞ്ചാവ് കടത്തുന്നതായുള്ള വിവരത്തിന്റെ അടിസ്ഥാനത്തില് അംബേദ്ക്കര് സ്റ്റേഡിയത്തിന് സമീപത്ത് ഡിസ്ട്രിക്ട് ആന്റി നര്ക്കോട്ടിക്സ് സ്പെഷ്യല് ആക്ഷന് ഫോഴ്സും(ഡാന്സാഫ്) എറണാകുളം സെന്ട്രല് പോലീസസും കാത്തുനിന്നാണ് പിടികൂടിയത്.
മഹസര് തയാറാക്കുന്നതിനിടെ സ്റ്റേഡിയത്തിനകത്തു കയറിയശേഷം യുവാവ് ഗ്യാലറിയിലൂടെ താഴെയുള്ള, തകര ഷീറ്റിട്ട കടയുടെ മുകളിലേക്ക് ചാടി. ഇവിടെ നിന്ന് താഴെയിറങ്ങിയെങ്കിലും ചുറ്റും പോലീസ് വളഞ്ഞതോടെ പ്രതി തൊട്ടടുത്ത പോസ്റ്റിന് മുകളിലേക്ക് കയറി. ഇതിനിടെ കൈവിട്ട് പ്രതി ലൈന് കമ്പിക്ക് മുകളിലേക്ക് വീഴുകയായിരുന്നു. നാല് കിലോയോളം കഞ്ചാവുമായാണ് രഞ്ജിത്തിനെ പോലീസ് പിടികൂടിയത്.
