ബംഗളൂരു : കര്‍ണാടകയിലെ ഹംപി ബദവി ലിംഗ ക്ഷേത്രത്തിലെ പുരോഹിതന്‍ പണ്ഡിറ്റ് കെ.എന്‍ കൃഷ്ണഭട്ട് (94) അന്തരിച്ചു. 40 വര്‍ഷത്തിലേറെയായി ഈ ക്ഷേത്രത്തിലെ പൂജാരിയായിരുന്നു അദ്ദേഹം. പ്രായത്തിന്റെ അവശതകള്‍ അലട്ടിയിരുന്നെങ്കിലും എല്ലാ ദിവസവും ക്ഷേത്രത്തില്‍ എത്തുകയും , പൂജാകര്‍മ്മങ്ങള്‍ നടത്തുകയും ചെയ്തിരുന്നു.
ഒരു കൈ കൊണ്ട് ശിവലിംഗത്തെ കെട്ടിപ്പിടിച്ച്‌ മറു കരം കൊണ്ട് ശിവലിംഗത്തെ സ്‌നാനം ചെയ്യുന്ന കൃഷ്ണഭട്ടിന്റെ ചിത്രങ്ങള്‍ സോഷ്യല്‍ മീഡിയയില്‍ ഏറെ ശ്രദ്ധ നേടിയിരുന്നു. ഭട്ട് പലപ്പോഴും 3 മീറ്റര്‍ നീളമുള്ള ശിവലിംഗത്തില്‍ കയറുകയും തലേ ദിവസം ദേവന് സമര്‍പ്പിച്ച പൂക്കള്‍ എടുത്ത് മാറ്റുകയും ചെയ്യുമായിരുന്നു.
നിത്യവും വെള്ളക്കെട്ട് നിറഞ്ഞ ഈ ക്ഷേത്രത്തില്‍ ശിവലിംഗത്തില്‍ കയറാന്‍ ഒരു ഗോവണി പോലും ഇല്ല. ഈ സാഹചര്യത്തില്‍ ഈ വൃദ്ധ ബ്രാഹ്മണന്‍ ശിവലിംഗത്തില്‍ പറ്റിപ്പിടിച്ച്‌ കിടന്നാണ് അതില്‍ വിഭൂതി ചാര്‍ത്തിയിരുന്നത്. വമോഗ ജില്ലയിലെ തീര്‍ത്ഥഹള്ളി താലൂക്കിലെ ഗ്രാമത്തില്‍ നിന്നുള്ളയാളാണ് കൃഷ്ണ ഭട്ട്.സത്യനാരായണ ക്ഷേത്രത്തില്‍ പുരോഹിതനായി ജോലി ചെയ്യാനാണ് അദ്ദേഹം ഹമ്പിയില്‍ എത്തിയത്. പിന്നീട് അനെഗുണ്ടി രാജകുടുംബം അദ്ദേഹത്തെ ബദവി ലിംഗ ക്ഷേത്രത്തിലെ പുരോഹിതനായി നിയമിക്കുകയായിരുന്നു.
