കൊട്ടാരക്കര: കുളക്കടയില്‍ കൊവിഡ് വാക്‌സിനേഷന്‍ മെഗാ ക്യാമ്പില്‍ ആള്‍ത്തിരക്ക്, നിയന്ത്രണം പാളിയത് പ്രതിസന്ധി സൃഷ്ടിച്ചു. ഇന്നലെ രാവിലെ മുതല്‍ കുളക്കട തുരുത്തിലമ്പലത്തിലാണ് കൊവിഡ് വാക്‌സിനേഷന്‍ മെഗാക്യാമ്പ് സംഘടിപ്പിച്ചത്.
കുളക്കട ഗ്രാമപഞ്ചായത്തും സാമൂഹികആരോഗ്യ കേന്ദ്രവും സംയുക്തമായാണ് ക്യാമ്പ് സംഘടിപ്പിച്ചത്. പത്ത് ദിവസമായി വാക്‌സിനേഷന്‍ ഇവിടെ നടന്നിരുന്നില്ല. അതുകൊണ്ടുതന്നെ വലിയ ആള്‍ത്തിരക്ക് രാവിലെ മുതല്‍ അനുഭവപ്പെട്ടു. ആഡിറ്റോറിയത്തിലാണ് മെഗാക്യാമ്പ് ഒരുക്കിയത്. രാവിലെതന്നെ ഓഡിറ്റോറിയം ആളുകളെക്കൊണ്ട് നിറഞ്ഞു. കൊവിഡ് നിയന്ത്രണങ്ങളെല്ലാം താറുമാറാകുംവിധം ആള്‍ത്തിരക്കായതോടെ അധികൃതര്‍ പൊലീസിനെ വിളിച്ചു.
പൊലീസെത്തി ഏറെനേരത്തെ പരിശ്രമത്തിന് ശേഷമാണ് കുറച്ചെങ്കിലും പരിഹാരമുണ്ടാക്കിയത്. കൂടുതലും വൃദ്ധജനങ്ങളാണ് വാക്‌സിനേഷനായി ക്യാമ്പിലെത്തിയത്. വേണ്ടത്ര ക്രമീകരണങ്ങളോ മുന്‍കരുതലോ ഇല്ലാതെ മെഗാ ക്യാമ്പ് നടത്തിയതില്‍ കളക്ടര്‍ വിശദീകരണം ആവശ്യപ്പെട്ടിട്ടുണ്ട്.
