തിരുവനന്തപുരം : എന്‍എസ്എസിനും ജി. സുകുമാരന്‍ നായര്‍ക്കുമെതിരെ വീണ്ടും പ്രസ്താവനയുമായി സിപിഐ സംസ്ഥാന സെക്രട്ടറി കാനം രാജേന്ദ്രന്‍. എന്‍എസ്എസിനെ പോലുള്ള സമുദായ സംഘടനയെ ഉപദേശിക്കാന്‍ മാത്രം കഴിവുള്ളവരാണ് ഇടത് നേതാക്കന്മാരെന്ന് സുകുമാരന്‍നായര്‍ക്ക് തോന്നിയെങ്കില്‍ അദ്ദേഹത്തിന് നന്ദിയെന്നായിരുന്നു കാനത്തിന്റെ പ്രസ്താവന.
തെരഞ്ഞെടുപ്പ് ദിനത്തില്‍ വിശ്വാസ സംരക്ഷണവുമായി ബന്ധപ്പെട്ട് സുകുമാരന്‍ നായര്‍ പ്രസ്താവന നടത്തിയിരുന്നു. ഇതിനെതിരെ കാനം ഉള്‍പ്പടെയുള്ള നേതാക്കള്‍ വിമര്‍ശനവുമായി എത്തുകയും ചെയ്തിരുന്നു. തുടര്‍ന്ന് വളഞ്ഞ വഴിയില്‍ ഉപദേശിക്കാന്‍ നോക്കേണ്ടെന്ന് സുകുമാരന്‍ നായര്‍ തക്കമറുപടി നല്‍കി. ഇതിനോട് പ്രതികരിക്കുകയായിരുന്നു കാനം.
എന്‍എസ്എസിനെ കുറിച്ചും അതിന്റെ നിലപാടുകളെ കുറിച്ചും അറിയുന്ന ഒരു കോട്ടയംകാരന്‍ എന്ന നിലയില്‍ അവര്‍ക്ക് സമദൂര നിലപാടാണെന്ന് അദ്ദേഹം തന്നോട് പറയുമെന്ന് കരുതുന്നില്ല. സുകുമാരന്‍ നായര്‍ മറച്ചുവെക്കാന്‍ ആഗ്രഹിച്ച രാഷ്ട്രീയമാണ് തെരഞ്ഞെടുപ്പ് നാളിലെ പ്രസ്താവനയിലൂടെ പുറത്തുവന്നതെന്നും അദ്ദേഹം കൂട്ടിച്ചേര്‍ത്തു.
