തിരുവനന്തപുരം: ആലപ്പുഴ ജില്ലയിലെ സിപിഎം ഉള്‍പ്പോര് മറനീക്കി വീണ്ടും പുറത്തേക്ക്. ഒരിടവേളയ്‌ക്കു ശേഷം ജി. സുധാകരനെ ലക്ഷ്യമിട്ട് കായംകുളം എംഎല്‍എ യു.പ്രതിഭ രംഗത്ത്. ഇലക്ഷന്‍ പ്രചാരണത്തില്‍ ചതി ഉണ്ടായെന്ന സൂചന നല്‍കിയാണ് ജി. സുധാകരനെ പരോക്ഷമായി ലക്ഷ്യമിട്ട് പ്രതിഭയുടെ ഫേസ്ബുക്ക് പോസ്റ്റ്. ജി.സുധാകരനെ ലക്ഷ്യംവെച്ചാണ് ഒളിയമ്പ് എന്ന കമന്റുകള്‍ നിറഞ്ഞതോടെ ഫെയ്സ്ബുക്ക് പോസ്റ്റ് എംഎല്‍എ മുക്കി. നിമിഷനേരംകൊണ്ട് നൂറുകണക്കിന് പേരാണ് എംഎല്‍എയുടെ പോസ്റ്റിനു താഴെ രാഷ്‌ട്രീയ ആരോപണങ്ങളും സംശയങ്ങളും ഉയര്‍ത്തി..’പൊട്ടനെ ചട്ടന്‍ ചതിച്ചാല്‍ ചട്ടനെ ദൈവം ചതിക്കും’ എന്നായിരുന്നു ഫേസ്ബുക്കില്‍ യു പ്രതിഭ എംഎല്‍എ രാത്രിയോടെ കുറിച്ചത്.
തൊട്ടുപിന്നാലെ ആരാണ് പൊട്ടന്‍ എന്നും ചട്ടനെന്നും കമന്റുകള്‍ നിറഞ്ഞു. ജി സുധാകരനെ ഉന്നം വെച്ചാണ് പ്രതിഭയുടെ പോസ്റ്റ് എന്നു കമന്റുകള്‍ വന്നു. കായംകുളത്തെ തെരഞ്ഞെടുപ്പ് പ്രവര്‍ത്തനങ്ങളില്‍ ചില നേതാക്കള്‍ തന്നെ കാലുവാരി എന്ന സൂചനയാണ് പ്രതിഭ നല്‍കുന്നതെന്ന രാഷ്‌ട്രീയ ആരോപണമാണ് ഭൂരിഭാഗം പേരും പങ്കുവച്ചത്. വിവാദ പ്രസ്താവനകളോടെ ഈ ദിവസങ്ങളില്‍ പ്രതിസന്ധിയില്‍ അകപ്പെട്ട മന്ത്രി ജി സുധാകരനെയാണ് ദൈവം ചതിച്ചതെന്നു പ്രതിഭ പറഞ്ഞതെന്ന് ഭൂരിഭാഗം കമന്റുകളും സമര്‍ത്ഥിച്ചു.
പോസ്റ്റിനു താഴെ പ്രതികരണങ്ങള്‍ നിറഞ്ഞതോടെ അകൗണ്ടില്‍ നിന്ന് പോസ്റ്റ് കാണാതായി. അല്‍പസമയത്തിനകം എംഎല്‍എയുടെ ഫോട്ടോ സമാനമായ സ്ഥലത്ത് മാറ്റി പോസ്റ്റ് ചെയ്തു. സമൂഹ മാധ്യമത്തിലെ തുറന്നേഴുത്ത് പൊതു ചര്‍ച്ചയ്‌ക്ക് വിധേയമായതോടെ അക്കൗണ്ട് ഹാക്ക് ചെയ്യപ്പെട്ടു എന്ന വിശദീകരണവുമായി വീണ്ടും പോസ്റ്റ് വന്നു. എന്നാല്‍ ഇതും കുറച്ചു സമയത്തിനു ശേഷം അപ്രത്യക്ഷമായി. തന്റെ അക്കൗണ്ട് ഹാക്ക് ചെയ്തവര്‍ക്കെതിരേ നിയമനടപടി ആവശ്യപ്പെട്ട് പിന്നീട് പ്രതിഭ രംഗത്തെത്തിയിട്ടുണ്ട്.
