ഡോ. രാധാകൃഷ്ണന് ശിവന്
ആധുനിക ഗൃഹനിര്മാണരീതികളില് ഒഴിവാക്കാന് കഴിയാത്ത ഒന്നാണ് ഗോവണി അഥവാ കോണിപ്പടികള്. പല നിലകളിലുള്ള പ്രാചീന ഗൃഹങ്ങളില് കോണിപ്പടി സ്ഥാപിക്കേണ്ട സ്ഥാനങ്ങളെ കുറിച്ചുള്ള നിയമങ്ങള് ഗ്രന്ഥങ്ങളില് സൂചിപ്പിക്കുന്നുണ്ട്.
ഗോവണിയുടെ നിയമങ്ങളില് പ്രധാനമാണ് ഗോവണിയുടെ സ്ഥാനം. കോണിപ്പടികള്ക്ക് ഏറ്റവും ഉചിതമായ സ്ഥാനങ്ങളായി കല്പ്പിക്കുന്നത് തെക്ക് ഭാഗവും പടിഞ്ഞാറ് ഭാഗവുമാണ്. നിര്മിതികളുടെ തെക്കും പടിഞ്ഞാറും ഉയര്ന്നിരിക്കണം എന്ന പ്രമാണവുമായി ചേര്ന്നിരിക്കുന്ന നിയമവുമാണ്.
വടക്ക്, കിഴക്ക് ദിക്കുകളില് കോണിപ്പടി വരാമെന്നിരിക്കെ തന്നെ വീടിന് തെക്കും പടിഞ്ഞാറും ഉയര്ത്താത്ത വിധം കോണിപ്പടികള് വരുന്നത് ഉചിതമല്ല.
കോണികള്ക്ക് എല്ലായ്പ്പോഴും പ്രദക്ഷിണക്രമമാണ് അഭികാമ്യം. അപ്രദക്ഷിണ രീതി കഴിവതും ഒഴിവാക്കണം. ഗോവണി തെക്കോട്ടു കയറുക എന്നുള്ളത് വലിയ ദോഷമായി ചിലര് പറയാറുണ്ടെങ്കിലും അതിന് വാസ്തു ശാസ്ത്ര ഗ്രന്ഥ
പിന്തുണയില്ലാതാകുന്നു. തെക്കോട്ടു കയറി പടിഞ്ഞാറോട്ടു വലന്തിരിഞ്ഞു വടക്കോട്ട് കയറുക, പടിഞ്ഞാറു കയറി വടക്കോട്ട് വലംതിരിഞ്ഞു കിഴക്കോട്ട് കയറുക എന്നിവ ഏറ്റവും ഉചിതവും, അതല്ലെങ്കില് വടക്കു കയറി കിഴക്കോട്ട് തിരിഞ്ഞു തെക്കോട്ടോ, കിഴക്കു കയറി തെക്കോട്ടു വലം തിരിഞ്ഞു പടിഞ്ഞാറോട്ടോ കയറുന്ന രീതിയിലോ സ്വീകരിക്കാവുന്നതാണ്. നാലുകെട്ടുകളില് വരാന്തയില് നിന്ന് കയറുന്ന വിധം ഇത്തരം രണ്ടു ഗോവണിപടികള് വരെ നല്കുക പതിവുണ്ട്.
വീടിന്റെ ഗോവണികള് ഒരിക്കലും വീടിന്റെ വടക്കു കിഴക്ക് ഭാഗത്തോ, ബ്രഹ്മസ്ഥാനത്തോ (മദ്ധ്യ ഭാഗത്തോ) ഒരിക്കലും പാടില്ലാത്തതാകുന്നു. ഗോവണികളുടെ അടിഭാഗം ഉപയോഗപ്രദമായി സ്വീകരിക്കാമെന്നിരിക്കെ തന്നെ ഈ ഭാഗം പൂജാമുറിയായി സ്വീകരിക്കാന് പാടില്ലാത്തതാകുന്നു.
ഇത്തരത്തില് ഗോവണികള് സ്ഥാപിക്കുമ്പോള് ആവശ്യം ഒഴിവാക്കേണ്ട ഒരു കാര്യമാണ് ദ്വാര വേധ ദോഷമെന്നുള്ളത്. വീടിന്റെ പ്രധാന വാതിലിന് നേര്ക്ക് ഗോവണികള് വരുന്നത് ഒഴിവാക്കണം.
പ്രധാന വാതിലുകള് മദ്ധ്യ സൂത്രങ്ങളില് അല്ല സ്ഥാപിക്കപ്പെട്ടിട്ടുള്ളത് എങ്കില് മദ്ധ്യ സൂത്ര സ്ഥാനങ്ങളിലും ഗോവണിയുടെ പ്രവേശനം ഒഴിവാക്കണം. പ്രധാന വാതിലിനു നേര്ക്ക് ഗോവണി വരരുത് എന്ന നിയമമിരിക്കെ തന്നെ പ്രധാന വാതിലില് നിന്ന് ദൃശ്യമായിട്ടുള്ള ഗോവണികളെ വാസ്തു വിരോധിക്കുന്നില്ല. പ്രധാന വാതിലിന്റെ അത്രയും വീതിയിലുള്ള ഭാഗം മാത്രമേ വേധമായി പരിഗണിക്കേണ്ടതുള്ളൂ. പ്രധാന വാതിലില് നിന്ന് കോണിയുടെ കാഴ്ച ദോഷകരമല്ലാത്തതാകുന്നു.
കോണിപ്പടികളുടെ എണ്ണം നിലകളുടെ ഉയരത്തിന് ആനുപാതികമായാണ് വരുന്നത് എങ്കിലും പടികള് ഇരട്ട സംഖ്യയില് വരുന്നതാണ് ഉചിതം. സാധാരണയായി നിലകള്ക്ക് നാലു കോല് രണ്ടു വിരല് മുതല് അഞ്ചു കോല് രണ്ടു വിരല് ഉയരം നല്കാവുന്നതാണ്.
ഇതിനനുസരിച്ചു പതിനെട്ട്, ഇരുപത്, ഇരുപത്തി രണ്ട് എന്നിങ്ങനെ പടികള് ആവാം. പടികള്ക്ക് നാല് വിരല് മുതല് ആറു വിരല് വരെ ഉയരം നല്കാം. എട്ടു വിരല് മുതല് പന്ത്രണ്ട് വിരല് വരെ വിസ്താരവും വേണ്ടതാകുന്നു. മേല്പറഞ്ഞ നിയമങ്ങള് എല്ലാം തന്നെ ഗൃഹാന്തര്ഭാഗത്തുള്ള ഗോവണികള്ക്കും അപ്രകാരം തന്നെ ഗൃഹത്തിന് പുറത്തുള്ളവയ്ക്കും ബാധകമാണ്.
