എടക്കര: വളര്ത്തുനായയെ സ്കൂട്ടറിനുപിന്നില് കിലോമീറ്ററോളം കെട്ടിവലിച്ച സംഭവത്തില് പ്രതി പിടിയില്. വെസ്റ്റ് പെരുങ്കുളം പ്രൈസ് വില്ല വില്സണ് സേവ്യറിനെയാണ് ഞായറാഴ്ച രാവിലെ എടക്കര പോലീസ് അറസ്റ്റ് ചെയ്തത്. ശനിയാഴ്ച ഉച്ചയ്ക്കാണ് സ്വന്തം വളര്ത്തുനായയെ വില്സണ് സേവ്യര് പെരുങ്കുളം റോഡിലൂടെ സ്കൂട്ടറില് കെട്ടിവലിച്ചത്. വാഹനം തടഞ്ഞുനിര്ത്തി നാട്ടുകാര് നായയെ രക്ഷിക്കുകയായിരുന്നു.
മൃഗങ്ങളോടുള്ള ക്രൂരത, ദേഹോപദ്രവം ഏല്പ്പിക്കല് തുടങ്ങിയ വകുപ്പുകള് ഉള്പ്പെടുത്തിയാണ് വില്സണ് സേവ്യറിന്റെ പേരില് പൊലീസ് കേസെടുത്തിരിക്കുന്നത്. ചെരിപ്പ് കടിച്ചുനശിപ്പിച്ചതിനെതുടര്ന്നാണ് നായയെ കെട്ടിവലിച്ചതെന്ന് ഇയാള് പൊലീസിന് മൊഴി നല്കി. പെരുങ്കുളം മുതല് മുസ്ല്യരങ്ങാടിവരെയുള്ള മൂന്ന് കിലോമീറ്ററോളം കെട്ടിവലിച്ചതിനെ തുടര്ന്ന് ശരീരം മുഴുവന് നായയ്ക്ക് പരിക്കേറ്റിരുന്നു. നായയെ പിന്നീട് നിലമ്പൂരില്നിന്നെത്തിയ റെസ്ക്യൂഫോഴ്സ് ഏറ്റെടുത്തു.
